Rusia dhe Serbia diskutojnë një kontratë të re afatgjatë për furnizimin me gaz
Ministri i Jashtëm rus, Sergey Lavrov, tha të mërkurën se vijojnë negociatat për furnizime shtesë me gaz rus për Serbinë dhe lidhjen e një kontrate të re afatgjatë, transmeton Anadolu.
Lavrov i bëri këto deklarata gjatë një takimi në Moskë me Aleksandar Vulin, kryetar i bordit mbikëqyrës të kompanisë shtetërore serbe Srbijagas, duke theksuar se Moska është e përkushtuar ndaj të gjitha marrëveshjeve të mëparshme.
“Për momentin, vijojnë negociatat për furnizime të mëtejshme me gaz dhe për një kontratë të re afatgjatë. E di se këtu ka qenë edhe drejtori i përgjithshëm i kompanisë shtetërore Srbijagas, Dushan Bajatoviq. Ne jemi plotësisht të përkushtuar ndaj të gjitha marrëveshjeve që kemi pasur dhe kemi aktualisht”, tha ai.
Lavrov tha se Moska shpreson që qeveria e re e Serbisë të sigurojë vazhdimësinë e partneritetit strategjik me Rusinë.
“Shpresojmë që edhe qeveria e re të sigurojë vazhdimësinë e partneritetit strategjik me Federatën Ruse. Jam shumë i kënaqur që ju takoj. Pres të na njihni me vlerësimet më të fundit mbi zhvillimet në vendin tuaj”, tha ai.
Në një mesazh drejtuar organizatorëve dhe pjesëmarrësve të Forumit të Katërt Ndërkombëtar të Astrakhanit, Lavrov tha se zhvillimi i Korridorit Ndërkombëtar të Transportit Veri-Jug (INSTC) hap mundësi të reja për forcimin e lidhjeve tregtare me jashtë dhe shfrytëzimin e potencialit ekonomik të vendeve euroaziatike.
Ai tha se, në kushtet e ndryshimeve në hartën logjistike botërore, po rritet nevoja për rrugë të reja të transportit të mallrave ndërmjet Rusisë dhe vendeve të tjera, përfshirë shfrytëzimin e mundësive tranzitore të rajonit të Kaspikut.
“Në përputhje me nismën e presidentit Vladimir Putin për krijimin e Partneritetit të Madh Euroaziatik, Korridori Ndërkombëtar i Transportit Veri-Jug synon të japë një kontribut të rëndësishëm në forcimin e lidhjeve tregtare me jashtë dhe në shfrytëzimin e potencialit investues dhe ekonomik të vendeve pjesëmarrëse”, tha ai.
Lavrov tha se forumi ndër vite është dëshmuar si një platformë e rëndësishme për dialogun ndërmjet autoriteteve, qarqeve të biznesit dhe ekspertëve.
“Jam i bindur se diskutimet e planifikuara në forum do të jenë konstruktive dhe se rezultatet e tyre do të sjellin ide frytdhënëse për mënyrat e avancimit të bashkëpunimit dhe integrimit në hapësirën euroaziatike”, shtoi ai.
