Eurodeputeti grek: “Shkupi (Maqedonia e Veriut) është një shtet i vogël inekzistent“
Eurodeputeti grek Emanuel Fragkos shkaktoi reagime me një publikim në të cilin vë në pikëpyetje shtetësinë dhe identitetin e Maqedonisë.
Në publikimin drejtuar presidentes së Komisionit Evropian, Ursula von der Leyen, Fragkos shprehet se „Shkupi është një shtet i vogël që nuk ekziston“, ndërsa parashtron edhe pretendime për përbërjen etnike të popullsisë dhe territorin e Maqedonisë.
Në videon e publikuar së bashku me mesazhin shfaqen harta historike dhe mesazhe politike, ndër to edhe një hartë ku territori i Maqedonisë paraqitet si „Vardarska“, si dhe me shënimin „bullgaro-shqiptare“.
Me këto mesazhe, eurodeputeti grek vë në pikëpyetje shtetësinë e Maqedonisë dhe identitetin kombëtar maqedonas.
Fragkos është eurodeputet që nga viti 2019 dhe është pjesë e grupit të Konservatorëve dhe Reformistëve Evropianë në Parlamentin Evropian. Ai është anëtar i partisë greke „Zgjidhja Greke“, e drejtuar nga Kyriakos Velopoulos, e cila mban qëndrime të theksuara nacionaliste dhe kundërshton Marrëveshjen e Prespës.
Publikimi vjen në një periudhë kur marrëdhëniet mes Shkupit dhe Athinës, si dhe çështjet që lidhen me integrimin evropian të Maqedonisë, janë sërish në fokus.
