MASH zgjati afatin për aplikimin e studentëve të rinj për akomodim në konviktet studentore

Ministria e Arsimit dhe Shkencës e ka zgjatur afatin për aplikimin e studentëve të rinj për akomodim në konviktet studentore, pasi u konstatua se një pjesë e studentëve të pranuar në afatin e dytë të regjistrimit nuk kanë kohë të mjaftueshme për ta përfunduar regjistrimin dhe për të siguruar vërtetim se janë studentë të rregullt, raporton Racin.

Fillimisht, aplikimi për studentët që këtë vit regjistrohen për herë të parë në fakultet duhej të përfundonte më 20 shtator. Konkursi për studentët e rinj filloi më 14 shtator, ndërsa për ta janë rezervuar 699 nga gjithsej 3.498 vendet në konviktet studentore në të gjithë Maqedoninë e Veriut.

Problemi u shfaq te kandidatët nga afati i dytë i regjistrimit. Në disa fakultete të Universitetit “Shën Kirili dhe Metodi” në Shkup, regjistrimi i studentëve të pranuar është caktuar për 21 shtator, përkatësisht një ditë pas afatit të përcaktuar fillimisht për konviktet studentore. Pa e përfunduar regjistrimin, ata nuk mund të sigurojnë në kohë vërtetimin për student të rregullt – një nga dokumentet e nevojshme gjatë aplikimit.

Pikërisht për këtë arsye MASH-i e zgjati afatin, me qëllim që edhe studentët që do ta përfundojnë regjistrimin në afatin e dytë të mund ta sigurojnë dokumentacionin e nevojshëm dhe të konkurrojnë në mënyrë të barabartë për akomodim.

Aplikimi bëhet në mënyrë elektronike përmes portalit për e-shërbime të Ministrisë, ndërsa studenti mund të aplikojë për pranim në një konvikt studentor.

Për vitin akademik 2026/2027, pjesa më e madhe e kapaciteteve u dedikohet studentëve të vitit të dytë dhe viteve më të larta – 2.799 vende, ndërsa 699 shtretër janë rezervuar për studentët e rinj.

Rezultatet përfundimtare për studentët e vitit të parë duhet të publikohen më së voni deri në fund të shtatorit. Nëse pas përfundimit të konkursit mbeten vende të lira, aplikimi mund të vazhdojë deri në plotësimin e kapaciteteve, por jo më vonë se 30 nëntori.