Indonezia angazhon qindra shpëtimtarë për kërkimin e 129 personave të zhdukur pas përmbysjes së një anijeje

Autoritetet indoneziane angazhuan të hënën më shumë se 600 shpëtimtarë për të kërkuar 129 persona që rezultojnë ende të zhdukur pas përmbysjes së një anijeje pasagjerësh në Detin Java, sipas mediave lokale, transmeton Anadolu.

Anija “Virgo Transport 8” kishte 243 persona në bord kur u përmbys për shkak të motit të keq të dielën herët, teksa udhëtonte nga Surabaya në Javan Lindore drejt Banjarmasinit në Kalimantanin Jugor.

Të paktën 108 persona janë shpëtuar dhe gjashtë janë konfirmuar të vdekur, raportoi media indoneziane Detik.com, duke cituar të dhënat e Agjencisë Kombëtare të Kërkimit dhe Shpëtimit, ose Basarnas, dhe Ministrisë së Transportit.

Shefi i Basarnas, Mohammad Syafii, tha se rreth 622 persona u angazhuan të hënën, ndërsa anije dhe avionë morën pjesë në operacionin e zgjeruar të kërkimit.

Gjithashtu u angazhuan ekipe të specializuara nënujore dhe dronë nënujorë të operuar nga Marina.

Marina e Indonezisë tha veçmas se kishte angazhuar pesë anije luftarake, si dhe avionë CN-235 dhe helikopterë për të mbështetur operacionin e përbashkët, sipas Detik.