Shefi i të drejtave të njeriut i OKB-së kërkon ulje të tensioneve ndërsa viktimat civile po rriten në Jemen
Sipas Zyrës së OKB-së për të Drejtat e Njeriut, që nga 6 gushti janë raportuar të paktën 17 viktima civile si pasojë e sulmeve të grupit Huthi në zonat nën kontrollin e qeverisë.
Komisioneri i Lartë i OKB-së për të Drejtat e Njeriut, Volker Turk, shprehu të hënën shqetësim të madh për rritjen e viktimave civile në mes të përshkallëzimit të armiqësive në Jemen, duke u bërë thirrje të gjitha palëve të tregojnë përmbajtje dhe të ulin menjëherë tensionet, transmeton Anadolu.
Sipas Zyrës së OKB-së për të Drejtat e Njeriut, që nga 6 gushti janë raportuar të paktën 17 viktima civile si pasojë e sulmeve të grupit Huthi në zonat nën kontrollin e qeverisë, ndërsa në fund të korrikut janë regjistruar dy viktima në zonat nën kontrollin e Huthive.
“U bëj thirrje të gjitha palëve të ulin tensionet dhe ta kursejnë popullin jemenas nga vuajtjet e mëtejshme”, tha Turk, duke paralajmëruar kundër veprimeve që mund ta rikthejnë vendin në një konflikt në shkallë të gjerë.
Më 7 gusht, një raketë e Huthive goditi kampin Jaw al-Naseem për personat e zhvendosur brenda vendit në Marib, duke plagosur gjashtë civilë, përfshirë një fëmijë.
Sulmet me raketa dhe dronë ndaj portit Al-Mokha në provincën Taiz më 9 gusht vranë tre punonjës të portit dhe plagosën katër të tjerë. Zyra e OKB-së po verifikon gjithashtu raportimet për sulme të tjera ndaj portit më 14 dhe 15 gusht, të cilat mund të kenë shkaktuar viktima civile.
Një sulm ndaj një anijeje mallrash në Ngushticën Bab al-Mandab më 11 gusht, sipas raportimeve, vrau katër anëtarë të ekuipazhit, tre shtetas pakistanezë dhe një indonezian, ndërsa disa të tjerë u plagosën.
Gjithashtu, sipas raportimeve, u goditën disa objekte civile, përfshirë depo karburanti dhe një kompleks banimi në Spitalin Fushor Saudit në Mokha.
“Është thelbësore që të gjitha palët t’i përmbahen të drejtës ndërkombëtare humanitare dhe të drejtave të njeriut”, tha Turk, duke u bërë thirrje atyre të përmbahen nga sulmet ndaj civilëve dhe objekteve civile.
Ai paralajmëroi se sulmet ndaj infrastrukturës civile rrezikojnë të përkeqësojnë vuajtjet në Jemen, ku të paktën 18 milionë njerëz tashmë përballen me pasiguri ushqimore.
“Këto sulme duhet të ndalen menjëherë”, shtoi ai.
