Zvicra eliminon Kolumbinë me penalti dhe siguron çerekfinalen
Kombëtarja e Zvicrës ka prerë biletën për në çerekfinale të Kupës së Botës, pasi triumfoi ndaj Kolumbisë vetëm pas serisë së penalltive.
Koha e rregullt dhe vazhdimet nuk prodhuan asnjë gol, me rezultatin që mbeti 0-0 edhe pas 120 minutave. Në fund, zviceranët u treguan më efikasë nga pika e bardhë, duke fituar 4-3 dhe duke siguruar një duel me kampionen në fuqi, Argjentinën, mes tetë skuadrave më të mira të turneut.
45 minutat e para u zhvilluan me ritëm të kujdesshëm, ku të dyja përfaqësueset u fokusuan më shumë te organizimi në mbrojtje sesa te rrezikimi i portës kundërshtare.
Kolumbia regjistroi rastin më të mirë të pjesës së parë në minutën e 21-të. Gustavo Puerta provoi me një goditje të fuqishme nga distanca, por portieri Gregor Kobel reagoi shkëlqyeshëm duke larguar topin në këndore.
Përgjigjja e Zvicrës erdhi në minutën e 30-të, kur Fabian Rieder përfitoi nga një gabim në mbrojtjen kolumbiane dhe u gjend në pozitë të favorshme për të shënuar. Megjithatë, Gustavo Vargas ndërhyri në momentin vendimtar dhe mbajti të paprekur portën e tij.
Edhe fraksioni i dytë i lojës, si dhe dy vazhdimet nga 15 minuta, nuk sollën ndryshim të rezultatit. Të dyja ekipet treguan kujdes maksimal, duke bërë që fituesi të përcaktohej përmes penalltive.
Në ekzekutimin e tyre, futbollistët zviceranë u treguan më të përqendruar dhe më të saktë, duke vulosur kualifikimin me rezultat 4-3.
Mes realizuesve për Zvicrën ishte edhe kapiteni Granit Xhaka, i cili nuk gaboi nga pika e bardhë.
Pas këtij suksesi, Zvicra e drejtuar në fushë nga Granit Xhaka do të përballet në çerekfinale me Argjentinën e Lionel Messit, në një ndeshje që pritet të jetë një nga më tërheqëset e këtij Botërori.
