Keiko Fujimori shpallet zyrtarisht fituese e zgjedhjeve presidenciale në Peru

Kandidatja e djathtë, Keiko Fujimori, është shpallur fituese e zgjedhjeve presidenciale në Peru nga autoriteti zgjedhor i vendit.

Njoftimi u bë të premten, disa javë pas balotazhit të 7 qershorit kundër rivalit të majtë, Roberto Sanchez.

Fujimori kishte një epërsi të ngushtë pas përfundimit të numërimit të votave më herët gjatë javës, ndërsa rezultatet zyrtare të publikuara të premten treguan një fitore shumë të ngushtë. Ajo mori 9.223.000 vota kundrejt 9.173.000 votave të Sanchez.

“Fillon një etapë e re”, shkroi Fujimori në rrjetin social X.

“E marrim këtë me përgjegjësi, përulësi dhe një ndjenjë të thellë detyrimi. Çdo ditë e këtij procesi tranzicioni është një mundësi për të dëgjuar, për të dialoguar dhe për t’u përgatitur për fillimin e qeverisë së re.”

Fujimori është vajza e ish-presidentit të ndjerë të Perusë, Alberto Fujimori, i cili ishte burgosur për shkelje të të drejtave të njeriut.

Ajo zhvilloi fushatë me premtimin për luftë më të ashpër kundër kriminalitetit dhe është zotuar të “bashkojë vendin”, i cili prej vitesh përballet me krizë politike dhe ekonomi të ngadalësuar.

Fujimori dhe Sanchez arritën në balotazh pasi lanë pas 33 kandidatë të tjerë në zgjedhjet e prillit.

Sanchez, i cili kishte mbështetje të fortë nga votuesit ruralë dhe komunitetet indigjene, ka pretenduar për parregullsi dhe mashtrim zgjedhor, por nuk ka paraqitur prova.

Vëzhguesit e zgjedhjeve kanë deklaruar se deri tani nuk ka dëshmi që mbështesin këto pretendime.

Sipas raportimeve nga Lima, Sanchez mund të përpiqet të sigurojë mbështetje politike për ta shkarkuar shpejt Fujimorin përmes Kongresit të vendit.

Shkarkime të tilla nuk janë të pazakonta në Peru, pasi kushtetuta lejon largimin e presidentit me miratimin e dy të tretave të parlamentit.

Fujimori pritet të bëhet presidentja e nëntë e Perusë në dhjetë vitet e fundit kur të marrë detyrën në fund të korrikut.

51-vjeçarja kishte kandiduar edhe në tre zgjedhjet e fundit presidenciale, por pa arritur sukses.

Mesazhi i saj për luftën kundër krimit duket se ka gjetur mbështetje, pasi Peruja vitet e fundit është përballur me rritje të krimit të organizuar, përfshirë zhvatjet, rrëmbimet dhe vrasjet me pagesë.

Ajo ka marrë gjithashtu mbështetje nga administrata e presidentit amerikan Donald Trump dhe nga liderë të tjerë të djathtë në Amerikën Latine, përfshirë Javier Milei.