Izraeli pengon të burgosurit palestinezë të dëbuar të ribashkohen me familjet e tyre

Sa herë që bie telefoni, Akrami pesëvjeçar dhe Julia dyvjeçare vrapojnë për t’iu përgjigjur, me shpresën për të folur me babanë e tyre, Amjad al-Najjar, i cili së fundmi u dëbua në Egjipt nga Izraeli pas lirimit nga një dënim i gjatë me burg.

Megjithëse fëmijët nuk e kanë takuar kurrë babanë e tyre, ata mbeten shumë të lidhur me të dhe ëndërrojnë që një ditë të largohen nga Ramallahu për ta takuar më në fund.

Të dy fëmijët janë konceptuar përmes spermës së nxjerrë fshehurazi nga një burg izraelit gjatë periudhës së burgimit 10-vjeçar të Amjadit. Lirimi i tij në janar të vitit 2025, si pjesë e një shkëmbimi të të burgosurve me Hamasin, çoi në dëbimin e tij në Egjipt së bashku me 228 palestinezë të tjerë.

48-vjeçari kishte shpresuar se lirimi do të shënonte fillimin e një jete të re me familjen, por për shkak të kufizimeve izraelite të udhëtimit ai nuk mund të shohë fëmijët e tij. Ai vazhdon të mbetet në mërgim në Egjipt, ndërsa familja e tij është e bllokuar në Bregun Perëndimor.

“Një pjesë e rëndësishme e kësaj lirie mbeti e paplotë, sepse takimi i parë me familjen time nuk ndodhi ashtu siç e kisha imagjinuar”, tha ai për Al Jazeera.

“Një nga gjërat më të vështira që përjetova ishte të bëhesha baba gjatë burgimit. Ishte një përvojë që mbartte gëzim të madh, por edhe dhimbje të thellë, sepse nuk isha i pranishëm kur lindën fëmijët e mi”, shtoi ai.

Një ribashkim që pret ende

Edhe Bushra, 10 vjeçe, nuk e ka takuar kurrë babanë e saj, por mban kontakte të rregullta me Ahmed Hamed përmes telefonatave, pasi ai u dëbua në Egjipt vitin e kaluar pas 22 vitesh burg në Izrael.

Bashkëshortja e tij, Inas, ka tentuar disa herë të udhëtojë drejt Kajros për ta takuar, por autoritetet izraelite ia kanë refuzuar vazhdimisht lejen, duke përmendur arsye sigurie.

Në mars, Bushra, e konceptuar gjithashtu përmes spermës së nxjerrë fshehurazi nga burgu, arriti më në fund të udhëtonte me hallën e saj drejt Egjiptit për të takuar babanë 51-vjeçar. Pas kthimit në Bregun Perëndimor, ajo dhe halla e saj u ndaluan dhe u morën në pyetje nga inteligjenca izraelite.

“Djali im Baraa ishte vetëm disa muajsh kur u arrestua babai i tij”, tha Inas.

“Tani ai është 22 vjeç dhe po përgatitemi për martesën e tij, por babai i tij nuk është me ne dhe ne nuk mund të udhëtojmë për ta parë.”

Ajo e përshkroi situatën si “tronditëse”.

“Ishim të lumtur për lirimin e tij, por gëzimi mbetet i paplotë – është vetëm gjysmë lirie”, tha ajo.

Edhe varri është i ndaluar

Edhe pas vdekjes, familjet palestineze vazhdojnë të ndahen nga të afërmit e tyre.

Në prill, Izraeli pengoi familjen e Riyad al-Amour, 57 vjeç, i dëbuar gjithashtu në Egjipt vitin e kaluar pas 23 vitesh burgim, që të merrte trupin e tij dhe ta varroste në vendlindjen e tij në Bregun Perëndimor.

Riyad u lirua tetorin e kaluar si pjesë e një marrëveshjeje shkëmbimi mes Izraelit dhe Hamasit dhe u dëbua në Egjipt.

Shëndeti i tij u përkeqësua disa ditë pas lirimit dhe ai ra në koma. Pesë muaj më vonë ai vdiq në një spital, qindra kilometra larg familjes së tij, pa arritur të shihte ose përqafonte asnjërin nga 12 nipërit e mbesat.

“Edhe pas vdekjes së tij, neve na mohohet e drejta të qëndrojmë pranë varrit të tij”, tha vëllai i tij, Majed.

Sipas Palestinian Prisoners Club, gjatë marrëveshjeve për shkëmbimin e të burgosurve në vitin 2025, 383 të burgosur palestinezë u dëbuan nga Bregu Perëndimor.

Ndërkohë, Hurriyat Center for the Defense of Liberties and Civil Rights ka dokumentuar më shumë se 8.700 ndalime udhëtimi për palestinezët në Bregun Perëndimor ndërmjet viteve 2014–2025.

Sipas drejtuesit të organizatës së të drejtave të njeriut Al-Haq, Shawan Jabarin, politika e ndarjes së detyruar të familjeve përbën ndëshkim kolektiv dhe shkel të drejtën e të burgosurve të liruar për të parë familjet e tyre. /Al Jazeera/