Kuvendi i Serbisë i hap rrugë ndërtimit të hotelit të dhëndrit të Trumpit në Beograd
Serbia ka miratuar të premten një ligj për t’i hapur rrugë ndërtimit të një hoteli luksoz në qendër të Beogradit nga kompania e Jared Kushnerit, dhëndrit të presidentit amerikan, Donald Trump. Ligji parasheh shembjen e ndërtesës së bombarduar të Shtabit të Përgjithshëm të Ushtrisë Jugosllave.
Ligji u miratua me 130 vota pro, ndërsa 40 ishin kundër, pas disa ditësh të debatit të nxehtë e protestave kundër planit.
Kushner, i cili është i martuar me vajzën e Trumpit, Ivankan, pati themeluar kompaninë që ka fituar projektin “Affinity Global Development” pasi pati dhënë dorëheqjen nga puna e tij si ndihmës në Shtëpinë e Bardhë në vitin 2021.
Qeveria dhe pushteti në Serbi e kanë vlerësuar projektin si shtytje ekonomike dhe forcim të lidhjes me SHBA-në, por plani është kundërshtuar nga ekspertët dhe opozitarë që e shohin si simbol të rezistencës ndaj bombardimeve të NATO-s.
Kompleksi i shekullit të shkuar u shkatërrua pjesërisht gjatë bombardimeve të NATO-s në vitin 1999, për t’i dhënë fund luftës në Kosovë. Ndërtesa deri tash ka qenë nën mbrojtje, por me ligjin e ri projekti shpallet “prioritet kombëtar” dhe anashkalon mbrojtjen.
Vitin e shkuar autoritetet serbe dhe kompania e Kushnerit “Affinity Global Development”, me seli në SHBA, nënshkruan një marrëveshje qiraje 99-vjeçare, duke i lejuar kompanisë të riparojë dy ndërtesa që dikur strehonin selinë e Ushtrisë Popullore Jugosllave.
Projekti përfshin një hotel, apartamente, dyqane dhe hapësira zyrash.
