Komisioni Evropian përgatit sanksione mbi 37% të tregtisë Izrael-BE

Komisioni Evropian po përgatit një paketë sanksionesh ndaj Izraelit.

Shefja e politikës së jashtme të BE-së, Kaja Kallas, i tha Euronews se masa synon të godasë pjesë të tregtisë së Izraelit me bllokun që bien nën marrëveshjet preferenciale të partneritetit tregtar, të cilat, sipas saj, përbëjnë rreth 37 për qind të 42.6 miliardë eurove (50.45 miliardë dollarëve) që u tregtuan në vitin 2024.

Kallas tha se ky hap “do të ketë një kosto të lartë për Izraelin” nëse miratohet. Masa kërkon mbështetjen e shumicës së shteteve anëtare të BE-së, dhe Kallas pranoi se kjo do të jetë e vështirë.

“Pyetja ime për të gjithë homologët, sepse nuk është vetëm Gjermania, ishte: nëse jeni dakord me diagnozën se situata është jashtëzakonisht e rëndë, situata është katastrofike dhe e paqëndrueshme, atëherë pyetja është: çfarë bëjmë për këtë?” tha ajo.

“Nëse nuk i mbështesni këto masa, atëherë cilat masa mund t’i mbështesni? Sillni alternativa.”