Turqia shënon rritjen më të madhe në OECD në të tre lëndët në renditjen akademike të PISA-s
Turqia shënoi përmirësimin më të madh ndër vendet e OECD-së në të tre lëndët në “PISA 2025”, duke rritur rezultatet në shkencë, lexim dhe matematikë, pavarësisht rënies së performancës mesatare në vendet e OECD-së, transmeton Anadolu.
Rezultatet e “PISA 2025”, të administruara nga Organizata për Bashkëpunim dhe Zhvillim Ekonomik (OECD), vlerësuan nxënësit 15-vjeçarë në shkencë, lexim dhe matematikë. Në ciklin e vitit 2025 morën pjesë 91 vende dhe ekonomi.
Turqia mori 494 pikë në shkencë, 472 në lexim dhe 462 në matematikë. Në shkencë dhe lexim, rezultatet e saj tejkaluan mesataren e OECD-së prej përkatësisht 482 dhe 461 pikësh ndërsa në matematikë arriti nivelin e mesatares së OECD-së prej 463 pikësh.
Në shkencë, Turqia u rendit e 19-ta mes 91 vendeve dhe ekonomive pjesëmarrëse, nga vendi i 34-t në vitin 2022. Në lexim u rendit e 18-ta, nga vendi i 36-të, ndërsa në matematikë e 28-ta, nga vendi i 39-të. Mes vendeve anëtare të OECD-së, Turqia u ngjit nga vendi i 29-të në të 14-in në shkencë, nga i 30-ti në të 13-in në lexim dhe nga i 32-ti në të 23-in në matematikë.
Përqindja e nxënësve turq me performancë të lartë u rrit në të tre lëndët. Në shkencë, ajo u rrit nga 4 për qind në vitin 2022 në 7,4 për qind në vitin 2025, duke tejkaluar për herë të parë mesataren e OECD-së prej 7,2 për qind. Në lexim, përqindja u rrit nga 1,9 për qind në 4,2 për qind ndërsa në matematikë nga 5,4 për qind në 7,9 për qind.
Krahasuar me vitin 2003, kur Turqia mori pjesë për herë të parë në PISA, rezultati i saj në shkencë u rrit nga 434 në 494 pikë, në lexim nga 441 në 472 pikë dhe në matematikë nga 423 në 462 pikë. Sipas rezultateve, Turqia ishte i vetmi vend anëtar i OECD-së që rriti rezultatet në të tre lëndët gjatë dekadës së fundit dhe vendi me rritjen më të madhe në të tre fushat krahasuar me vlerësimin e vitit 2022.
Raporti theksoi përmirësime në mjediset fizike dhe sociale të të nxënit në Turqi, të cilat u vlerësuan më mirë se mesatarja e OECD-së. Përmirësime u evidentuan edhe në mungesat dhe cilësinë e personelit arsimor.
