Senatori amerikan: Forcat izraelite kanë shkelur të drejtën ndërkombëtare humanitare në Gaza
Senatori demokrat amerikan, Jon Ossoff, ka deklaruar se forcat izraelite kanë shkelur ligjin e konfliktit të armatosur dhe të drejtën ndërkombëtare humanitare gjatë luftës së tyre në Rripin e Gazës, transmeton Anadolu.
Duke iu përgjigjur një pyetjeje gjatë debatit për Senatin në Xhorxhia, lidhur me faktin nëse Izraeli ka kryer gjenocid në Gaza, Ossoff tha se gjenocidi kërkon ekzistencën e një qëllimi të veçantë për të shkatërruar një grup kombëtar ose etnik.
“Çështja e gjenocidit ka të bëjë me faktin nëse një qeveri ka qëllimin e veçantë për të shkatërruar një grup kombëtar ose etnik”, tha Ossoff, duke shtuar se përcaktimi për këtë çështje i takon Gjykatës Penale Ndërkombëtare (GJPN).
“Në mendjen time nuk ka asnjë dyshim se forcat izraelite, gjatë zhvillimit të luftës në Gaza, kanë shkelur ligjin e konfliktit të armatosur dhe të drejtën ndërkombëtare humanitare”, tha ai.
Ossoff, i cili po kandidon për t’u rizgjedhur në Senat, mbrojti gjithashtu votat e tij të mëparshme për bllokimin e disa dërgesave të armëve amerikane drejt Izraelit.
“Siguria e popullit izraelit më intereson thellësisht, pasi mes tyre ka edhe anëtarë të familjes sime. Më intereson gjithashtu jeta e palestinezëve të pafajshëm dhe nuk kërkoj falje për votat e mia”, tha ai.
Ossoff i bëri këto deklarata gjatë debatit të tij të parë televiziv me kundërshtarin republikan, kongresistin Mike Collins, përpara zgjedhjeve të mesmandatit që do të mbahen më 3 nëntor.
Organet e OKB-së, ekspertët dhe organizatat për të drejtat e njeriut kanë arritur në përfundimin se Izraeli ka kryer gjenocid në Gaza, ku gjatë tre viteve të fundit ka vrarë më shumë se 74.000 persona, ka plagosur shumë të tjerë dhe ka shkatërruar pjesën më të madhe të infrastrukturës.
Gjykata Ndërkombëtare e Drejtësisë vazhdon procedurat për të përcaktuar nëse Izraeli ka kryer gjenocid.
Ndërkohë, në vitin 2024, Gjykata Ndërkombëtare e Drejtësisë lëshoi urdhër-arreste për kryeministrin izraelit, Benjamin Netanyahu dhe ish-ministrin e Mbrojtjes, Yoav Gallant, për krime të dyshuara lufte dhe krime kundër njerëzimit në Gaza.
