Presidenti sirian: Siria kërkon marrëveshje të re sigurie me Izraelin që garanton tërheqjen në kufijtë e vitit 1974
Presidenti i Sirisë, Ahmad al-Sharaa ka deklaruar se Damasku po kërkon marrëveshje të re të sigurisë me Izraelin që do të garantonte tërheqjen në vijat e çmilitarizimit të vitit 1974, si pjesë e një qasjeje graduale drejt negociatave më të gjera të mundshme, raporton Anadolu.
Duke folur në një panel gjatë Forumit të Diplomacisë në Antalya në Turqi, Al-Sharaa tha se marrëveshja e vitit 1974 ka qëndruar për më shumë se pesë dekada, por më pas është minuar nga shkeljet izraelite, veçanërisht pas rënies së regjimit të mëparshëm sirian në dhjetor të vitit 2024.
“Ne tani po hyjmë në nivelin e parë (të bisedimeve), që është kërkimi i një marrëveshjeje sigurie që garanton tërheqjen e Izraelit në kufijtë e vitit 1974 dhe vendos rregulla të reja, qoftë përmes respektimit të marrëveshjes ose përshtatjes së saj në një mënyrë që garanton sigurinë e të dyja palëve”, tha ai.
Presidenti sirian shtoi se nëse kjo ka sukses, procesi mund të çojë në negociata afatgjata për zgjidhjen e statusit të Lartësive të Golanit të pushtuara. “Nëse kjo ka sukses, mund të hyjmë në negociata afatgjata për të zgjidhur çështjen e Golanit të pushtuar”, shtoi Al-Sharaa.
Ai hodhi poshtë çdo njohje të sovranitetit izraelit mbi këtë territor. “Çdo njohje e pretendimit të Izraelit mbi Golanin sirian të pushtuar është e pavlefshme. Kjo është një e drejtë që i përket popullit sirian, jo ndonjë qeverie”, tha ai.
Pas rënies së regjimit të Asadit më 8 dhjetor të vitit 2024, Izraeli shpalli kolapsin e Marrëveshjes së Çmilitarizimit të vitit 1974 dhe mori nën kontroll zonën tampon përgjatë kufirit.
Pavarësisht se administrata e re siriane nuk ka bërë kërcënime ndaj Izraelit, forcat izraelite kanë kryer sulme ajrore në Siri që nga rrëzimi i Asadit, duke vrarë civilë dhe duke goditur objektiva ushtarake, pajisje dhe municione.
