Po magjeps Serinë A me klasin e tij, e ardhmja e Nico Paz mes Real Madrid dhe Inter-it
Emri i Nico Paz vazhdon të jetë një nga më të diskutuarit në skenën e merkatos europiane. Mesfushori i ri argjentinas, aktualisht pjesë e Como-s, ndodhet në qendër të një situate të ndërlikuar që lidhet drejtpërdrejt me Real Madridin.
Klubi spanjoll ruan një të drejtë të veçantë për ta rikthyer lojtarin në “Santiago Bernabeu” për një shifër rreth 9 milionë euro, një opsion që e bën Realin faktorin kryesor në vendimmarrjen për të ardhmen e tij. Duke parë rritjen e ndjeshme të vlerës së lojtarit, që tashmë është shumëfishuar në treg, madrilenët pritet të lëvizin për ta aktivizuar këtë klauzolë.
Plani i Real Madridit është i qartë: rikthimi i tij në skuadër për ta vlerësuar gjatë fazës përgatitore verore, përpara se të vendoset nëse do të mbetet pjesë e ekipit të parë apo do të huazohet sërish për të fituar eksperiencë.
Në këtë garë mbetet i interesuar edhe Interi, që prej kohësh ndjek zhvillimin e lojtarit dhe shpreson në një hap të mundshëm të gabuar nga madrilenët për të hyrë në negociata. Megjithatë, kontrolli i Realit mbi kartonin e tij e bën operacionin shumë të vështirë për klubet e tjera.
Edhe Como nuk dorëzohet lehtë, duke shpresuar ta mbajë talentin të paktën edhe për një sezon, sidomos nëse arrin objektiva të rëndësishëm në kampionat që do ta çonin në kompeticionet europiane.
E ardhmja e Nico Paz mbetet kështu e hapur, por me një drejtim të qartë: fjala e fundit i përket Real Madridit, ndërsa klubet e tjera ndjekin me vëmendje çdo lëvizje të verës.
