Përmbytje katastrofike në kufirin Nepal–Tibet, 157 të vdekur dhe qindra të zhdukur
Një përmbytje e fuqishme e menjëhershme ka goditur zonat malore në kufirin mes Nepalit dhe Tibetit, duke shkaktuar të paktën 157 viktima dhe qindra persona të zhdukur, mes tyre edhe shumë turistë të huaj. Sipas autoriteteve nepaleze, 384 persona janë raportuar të zhdukur, përfshirë 291 shtetas të huaj.
Fatkeqësia u shkaktua nga një ortek akulli dhe shkëmbinjsh, i cili solli vërshime masive që shkatërruan shtëpi, rrugë, ura dhe objekte të infrastrukturës. Në mesin e të zhdukurve janë shtetas nga India, Britania e Madhe, SHBA-ja, Australia, Koreja e Jugut dhe vende të tjera.
Autoritetet kanë angazhuar mijëra persona në operacionet e kërkim-shpëtimit, ndërsa ekipet pritet të vazhdojnë punën edhe gjatë natës. Organizata ndërkombëtare, përfshirë OKB-në, OBSH-në dhe Kryqin e Kuq, kanë ofruar ndihmë për Nepalin.
Ekspertët paralajmërojnë gjithashtu për mundësinë e një vale të dytë përmbytjesh, pasi një bllokim i ujit është krijuar më lart në rrjedhën e lumit pranë kufirit Nepal–Kinë. Analizat e fundit të Shërbimit Gjeologjik të SHBA-së tregojnë se, ndryshe nga raportimet fillestare, nuk kishte tërmet para përmbytjes
