PDK tërhiqet nga seancat e Kuvendit: Çështjen do ta dërgojë në Kushtetuese
Partia Demokratike e Kosovës ka bërë të ditur se nuk do të marrë pjesë në seancat e Kuvendit deri në një vendim të Gjykatës Kushtetuese lidhur me procesin e konstituimit të legjislativit.
Në një komunikatë, PDK-ja ka akuzuar Lëvizjen Vetëvendosje për shkelje të afateve kushtetuese dhe për bllokim të përsëritur të procesit, duke thënë se kushtet e reja politike të vendosura nga LVV-ja e kanë pamundësuar përfundimin e konstituimit.
Sipas PDK-së, Kuvendi është dashur të konstituohet brenda afatit 30-ditor, më së largu më 7 gusht, ndërsa edhe afati i dytë, 6 shtatori, nuk është respektuar.
PDK-ja thotë se, pavarësisht kësaj, mori pjesë në seancat e 9 dhe 11 shtatorit me qëllim që procesi të përmbyllej. Sipas partisë, ajo votoi kandidatin e LVV-së për nënkryetar, ndërsa LVV-ja nuk e votoi kandidaten e PDK-së.
Partia opozitare ka kundërshtuar edhe kushtëzimin e votimit të nënkryetarëve me votimin për Presidentin e Republikës, duke theksuar se “Kushtetuta nuk është pazar politik”.
PDK-ja ka njoftuar se ekspertët e saj janë duke përgatitur rastin që do t’i drejtohet Gjykatës Kushtetuese për procesin në tërësi.
“Deri në vendimin e Gjykatës Kushtetuese, qëndrimi i Partisë Demokratike të Kosovës mbetet i qartë: PDK nuk do të marrë pjesë në seancat e Kuvendit”, thuhet në komunikatë.
Si dhe, Partia Demokratike e Kosovës e ka tërhequr kandidaturën e Vlora Çitakut për nënkryetare të Kuvendit.
Shefi i grupit parlamentar të PDK-së, Arian Tahiri ia ka dërguar një letër kryetares së Kuvendit, Albulena Haxhiu, duke e njoftuar për “tërheqjen e përkohshme të kandidaturës së znj. Vlora Çitaku për pozitën e nënkryetares së Kuvendit të Republikës së Kosovës”.
