Nesër rikonstruimi i qeverisë, VMRO: Ekip që do përshpejtojë zhvillimin

Kanë mbetur edhe pak orë deri në votimin e qeverisë së re të rikonstruuar. Të hënën në seancë plenare do të votohet për përbërjen e re të qeverisë. Sipas agjendës dhe rregullores së paraparë, në orën 11:00 nis procedura për shkarkimin dhe emërimin e ministrave në tetë dikastere, respektivisht në një të tretën e kabinetit qeveritar. Nga partia në pushtet VMRO-DPMNE, thanë se edhe pas këtij rikonstruimi, shumica qeverisëse do t’i rrisë sukseset dhe do të sjellë një ritëm më të përshpejtuar në reforma dhe qeverisje.

“Gjatë këtyre dy viteve kemi dëshmuar dhe treguar se si duhet të udhëhiqen institucionet shtetërore, si mund të realizohen me sukses një numër i madh projektesh dhe masash në interes të qytetarëve. E gjithë kjo ndërkohë që në të njëjtën periudhë kemi shlyer borxhe dhe kamata interesi të vjetra, ndërsa njëkohësisht historikisht janë rritur edhe pensionet dhe pagat. Prandaj, besoj se me rikonstruimin e nesërm qeveria e udhëhequr nga VMRO-DPMNE-ja do të tregojë se di si ta përshpejtojë zhvillimin e Maqedonisë.”, u shpreh Vallentin Manasievski nga VMRO-DPMNE.