Mjekët pa kufij: Izraeli po përdor qasjen në ujë si “armë” të ndëshkimit kolektiv në Gaza
Organizata “Mjekët pa kufij” tha të martën se autoritetet izraelite po përdorin qasjen në ujë si një “armë” të ndëshkimit kolektiv kundër palestinezëve në Gaza, duke bërë thirrje për rikthimin e menjëhershëm të furnizimit me ujë dhe qasje të papenguar humanitare.
Në një raport të ri, “MPF” tha se kufizimet e përsëritura në qasjen në ujë janë pjesë e një “modeli sistematik dhe kumulativ”.
“Autoritetet izraelite e dinë se pa ujë jeta përfundon, megjithatë ata kanë shkatërruar qëllimisht dhe sistematikisht infrastrukturën e ujit në Gaza, ndërkohë që vazhdimisht kanë bllokuar furnizimet e lidhura me ujin që të hyjnë,” tha Claire San Filippo, menaxhere e emergjencave në “MPF”.
Sipas raportit, pothuajse 90% e infrastrukturës së ujit dhe kanalizimeve në Gaza është dëmtuar ose shkatërruar, përfshirë impiantet e desalinizimit, tubacionet dhe sistemet e ujërave të zeza.
“Palestinezët janë plagosur dhe vrarë thjesht duke u përpjekur të sigurojnë ujë,” tha San Filippo, duke paralajmëruar se mungesa e ujit po nxit përhapjen e sëmundjeve në kushtet e mbipopullimit dhe një sistemi shëndetësor të rrënuar.
“MPF” tha se një në pesë nga shpërndarjet e saj të ujit u ndërprenë midis majit dhe nëntorit 2025 për shkak të mungesave dhe kufizimeve të qasjes.
Organizata i bëri thirrje Izraelit të rikthejë qasjen në ujë “në nivelet e nevojshme”, ndërsa u kërkoi aleatëve të ushtrojnë presion ndaj Izraelit që të ndalojë pengimin e qasjes humanitare, përfshirë materialet e nevojshme për infrastrukturën e ujit.
“Pasojat e kësaj privimi nga qasja në ujë janë të gjera për shëndetin, higjienën dhe dinjitetin e njerëzve,” thuhet në raport.
