Liderët e BE-së kërkojnë masa për të lehtësuar presionin e çmimeve të energjisë para dimrit
Liderët e Bashkimit Evropian (BE) kanë diskutuar masat për të lehtësuar rritjen e çmimeve të energjisë dhe për të zbutur ndikimin e tyre mbi familjet, bizneset dhe ekonominë e gjerë evropiane përpara dimrit të ardhshëm, transmeton Anadolu.
Në samitin e Këshillit Evropian në Bruksel, sipas një zyrtari, liderët shprehën shqetësimin për ndikimin e situatës së paqëndrueshme në Lindjen e Mesme mbi çmimet e naftës dhe gazit, duke theksuar se rritja e kostove po prek drejtpërdrejt familjet dhe bizneset evropiane.
Ata paralajmëruan gjithashtu se dimri i ardhshëm mund të sjellë presion shtesë mbi çmimet e energjisë, duke theksuar nevojën për masa afatshkurtra për të përballuar ndikimin e menjëhershëm të rritjeve të forta të çmimeve.
Në këtë kontekst, liderët shprehën mbështetje për masat e propozuara nga Komisioni Evropian, ndërsa diskutimet u përqendruan edhe te hapat e mundshëm shtesë për të lehtësuar barrën e kostove të larta të energjisë.
Rishikimi në vazhdim i Sistemit të Tregtimit të Emetimeve të BE-së (ETS) ishte një tjetër çështje kyçe, ku liderët ndanë pritshmëritë e tyre lidhur me negociatat legjislative që janë duke u zhvilluar.
Edhe pse debati për këtë çështje kishte nisur përpara paqëndrueshmërisë së tanishme të çmimeve të energjisë, zhvillimet në Lindjen e Mesme i kanë dhënë atij një urgjencë të re.
Zyrtari tha se disa liderë ngritën gjithashtu nevojën për të shqyrtuar modelin e tregut të energjisë elektrike të bllokut, si pjesë e përpjekjeve më të gjera për të përballuar presionin mbi çmimet e energjisë.
Pas diskutimeve, presidenti i Këshillit Evropian, Antonio Costa, propozoi disa ndryshime në projekt-përfundimet e samitit.
Liderët e BE-së u mblodhën për të diskutuar konkurrueshmërinë, çështjet energjetike dhe pabarazitë ekonomike gjatë samitit dyditor, ndërsa në agjendë ishin gjithashtu diskutime më të gjera për Lindjen e Mesme dhe Ukrainën.
