Le Pen jep një sinjal të fortë se Franca e së ardhmes mund të mos jetë në BE
Rezultati i referendumit në Islandë kundër rifillimit të negociatave për anëtarësimin në Bashkimin Evropian ka marrë një tjetër dimension politik në Francë, pasi Marine Le Pen e ka përdorur votën islandeze si argument për vizionin e saj për një Evropë të përbërë nga shtete më të pavarura dhe sovrane.
Në një reagim në rrjetin social X, Le Pen e cilësoi vendimin e islandezëve si një rikujtim të asaj që ajo e quan “një të vërtetë të dukshme”: anëtarësimi në Bashkimin Evropian nuk është horizonti i natyrshëm për çdo demokraci evropiane.
Sipas saj, vota e islandezëve tregon se popujt duhet të kenë të drejtën të vendosin vetë për të ardhmen e tyre, institucionet dhe aftësinë për të mbrojtur interesat kombëtare.
Mesazhi i Le Pen shkon përtej Islandës. Ajo e vendos rezultatin në përballje me projektin e një integrimi më të thellë evropian, duke kundërshtuar atë që e quan rritje të federalizmit dhe transferim të mëtejshëm të sovranitetit drejt Komisionit Evropian.
“Një Evropë tjetër është e mundur – një Evropë e kombeve të lira dhe sovrane që bashkëpunojnë vullnetarisht në çështje me interes të përbashkët”, argumenton liderja franceze.
Islanda si shembull politik
Referendumi islandez nuk vendosi drejtpërdrejt për anëtarësimin në BE, por për rifillimin e negociatave të anëtarësimit. Megjithatë, rezultati ishte i qartë: rreth 52.8% votuan kundër, ndërsa 47.2% pro, me një pjesëmarrje prej rreth 82.5%.
Çështjet që dominuan fushatën ishin sovraniteti, kontrolli mbi burimet natyrore dhe veçanërisht peshkimi. Për shumë votues, ruajtja e kontrollit kombëtar mbi ujërat dhe industrinë e peshkimit ishte më e rëndësishme sesa përfitimet e mundshme ekonomike nga një integrim më i madh në BE.
Pikërisht këtë element duket se kërkon të shfrytëzojë Le Pen, idenë se një shtet evropian mund të bashkëpunojë me BE-në pa e konsideruar domosdoshmërish transferimin e mëtejshëm të kompetencave kombëtare si destinacionin përfundimtar.
Sinjal për Francën?
Deklarata merr peshë të veçantë kur vendoset në kontekstin francez.
Marine Le Pen ka qenë prej vitesh një nga figurat më kritike ndaj integrimit evropian. Në vitin 2017 ajo mbështeti hapur idenë e një referendumi për daljen e Francës nga BE-ja, ndërsa më vonë Rassemblement National u zhvendos nga kërkesa për “Frexit” drejt një strategjie që synon ndryshimin e vetë funksionimit të Bashkimit Evropian nga brenda.
