Lavrov: Marrëveshja Rusi-SHBA për naftën jep “kontribut të rëndësishëm” për sigurinë energjetike
Ministri i Jashtëm rus, Sergey Lavrov tha sot se një marrëveshje midis Moskës dhe Washingtonit për të lehtësuar kufizimet mbi eksportet e naftës ruse ka dhënë kontribut të rëndësishëm në sigurinë globale të energjisë, transmeton Anadolu.
Në një artikull të botuar në të përditshmen ruse “Kommersant”, Lavrov tha se Moska, ndryshe nga kundërshtarët e saj, nuk përdor lidhjet ekonomike për të “larguar hesapet gjeopolitike” ose për të minuar konkurrentët, duke vënë në dukje se Rusia i ka furnizuar Evropës burime energjie me vlerë 320 miliardë dollarë.
“Një kontribut i rëndësishëm në sigurinë e energjisë ishte marrëveshja e arritur midis udhëheqësve të Rusisë dhe SHBA-së për të pezulluar kufizimet në eksportin e karburantit rus dizel”, tha Lavrov.
Ai tha se zbatimi i marrëveshjes kishte filluar tashmë, duke shkaktuar rënie të menjëhershme të çmimeve dhe u zotua se Moska do të vazhdojë të punojë për të stabilizuar tregjet globale të energjisë, për të mbrojtur sigurinë e energjisë dhe për të mbështetur zhvillimin e ekuilibruar dhe të qëndrueshëm.
Muajin e kaluar, presidenti i SHBA-së Donald Trump njoftoi marrëveshje furnizimi me naftë pas një telefonate me presidentin rus Vladimir Putin, sipas së cilës Moska pranoi të “furnizonte menjëherë” më shumë se 300 mijë tonë naftë në tregjet e SHBA-së dhe globale.
Trump tha se Rusia do të dorëzonte edhe 500 mijë tonë të tjerë në nëntor, të ndjekur nga 1 milion ton “menjëherë pas kësaj”. Ai shtoi se edhe 3 milionë tonë të tjerë do të furnizohen “brenda një periudhe të shkurtër”, varësisht nga gjendja e rafinerive ruse të naftës.
Putini tha se furnizimet do të përfitonin ekonominë globale ndërsa presidenti ukrainas Volodymyr Zelenskyy kritikoi marrëveshjen, duke paralajmëruar se lehtësimi i kufizimeve mbi eksportet ruse të naftës mund të ndihmojë në financimin e përpjekjeve të luftës së Moskës.
Lavrov argumentoi se një sistem i qëndrueshëm global i energjisë është thelbësor për rritjen e qëndrueshme ekonomike dhe zhvillimin teknologjik, duke akuzuar sanksionet perëndimore dhe sekuestrimin e cisternave në pronësi të huaj për prishjen e tregjeve të karburantit.
Ai akuzoi Ukrainën për sulme të vazhdueshme në infrastrukturën kritike në Rusi dhe gjetkë, duke thënë se sulmet kanë “kaluar pa u vënë re” pavarësisht thirrjeve të Trumpit që ato të ndaleshin. Lavrov e përshkroi mbylljen e Ngushticës së Hormuzit si një faktor tjetër të madh destabilizues që ka prekur rëndë sektorin e energjisë.
“Pretendimet e NATO-s, BE-së dhe shteteve të tyre anëtare për të diktuar kushte në zona të ndryshme detare janë krejtësisht të papranueshme”, tha ai. Duke kaluar te siguria ushqimore, Lavrovi e përshkroi atë si një tjetër shtyllë thelbësore të stabilitetit global, duke pretenduar se sanksionet dhe pengesat e tjera kanë kontribuar në urinë që prek më shumë se 600 milionë njerëz në mbarë botën.
Kryediplomati rus theksoi se vendet perëndimore po i rezistojnë shfaqjes së një rendi botëror shumëpolar.
“Në përputhje me një paradigmë koloniale, e cila nuk është zhdukur aspak, bëhen përpjekje për t’u mohuar qendrave në rritje të zhvillimit në Jugun dhe Lindjen globale të drejtën për të marrë pjesë në qeverisjen globale, në një mënyrë që përputhet me peshën e tyre reale në çështjet botërore”, shtoi Lavrov.
