Kreu i UNRWA-s: Planet e reja për Gazën janë “shpërqendrim nga mizoritë”

Komisioneri i përgjithshëm i Agjencisë së Kombeve të Bashkuara për Refugjatët Palestinezë (UNRWA), Philippe Lazzarini, ka theksuar rrezikun e afërt të urisë masive që po kërcënon popullatën e Gazës.

“Mos e shpikni rrotën nga e para: hartimi i ‘planeve’ të reja është një shpërqendrim nga mizoritë dhe një humbje burimesh,” shkroi ai në një postim në platformën X.

Lazzarini shtoi se organizatat humanitare, përfshirë edhe UNRWA-në që ai drejton, janë të gatshme të ndihmojnë palestinezët në nevojë, duke kërkuar heqjen e bllokadës izraelite.

“Ndihmat tona janë të grumbulluara jashtë: ushqimi do të kalbet, barnat do të skadojnë. Ndërkohë, ora po numëron drejt urisë. Njerëzit në Gaza po vdesin… Hiqni rrethimin. Hapni portat. Na lejoni të bëjmë punën tonë.”