Kremlini: Putini i gatshëm të bisedojë me Trumpin, por kërkesat për Ukrainën mbesin të njëjta

Presidenti rus, Vladimir Putin, është gati të diskutojë për Ukrainën me Donald Trumpin, por kjo nuk do të thotë se ai është i gatshëm të ndryshojë kërkesat e Moskës, ka njoftuar Kremlini zyrtar të premten.

Zëdhënësi i Putinit, Dmitry Peskov, i bëri komentet pasi u pyet nëse gatishmëria e Putinit për të biseduar me presidentin e zgjedhur republikan pasqyronte një gatishmëri për të ndryshuar këto kërkesa.

“Presidenti nuk ka thënë kurrë se qëllimet e operacionit special ushtarak po ndryshojnë. Përkundrazi, ai ka thënë vazhdimisht se ato mbeten të njëjta”,  tha Peskov.

Putini më 14 qershor përcaktoi kushtet e tij për t’i dhënë fund luftës: Ukrainës do t’i duhet t’i heqë ambiciet e saj për t’u bërë pjesë e  NATO-s dhe të tërheqë të gjitha trupat e saj nga i gjithë territori i katër rajoneve të pretenduara nga Rusia.

Ukraina e hodhi poshtë këtë, duke thënë se do të ishte e barabartë me kapitullimin dhe presidenti ukrainas Volodymyr Zelensky ka paraqitur një “plan fitoreje” që përfshin kërkesat për mbështetje shtesë ushtarake nga Perëndimi, raporton Reuters.

Gjatë fushatës zgjedhore, Trump kritikoi shkallën e mbështetjes ushtarake dhe financiare të SHBA për Kievin dhe tha se ai mund t’i jepte fund luftës brenda 24 orëve, pa thënë se si.

Zelensky e ka uruar Trumpin për fitoren, por tha se nuk e di se si amerikani planifikon t‘i japë fund konfliktit shpejt. “Nëse është thjesht e shpejtë, kjo do të thotë humbje për Ukrainën. Unë thjesht nuk e kuptoj ende se si mund të jetë kjo në ndonjë mënyrë tjetër. Ndoshta ne nuk dimë diçka, nuk e shohim”,  tha ai të enjten.