Irani shënjestron 2 anije amerikane dhe 8 cisterna nafte në Gjirin Persik
Trupat e Gardës Revolucionare Islamike të Iranit (IRGC) thanë sot se forcat e tyre detare shënjestruan 2 anije amerikane dhe 8 cisterna nafte në Gjirin Persik, duke pretenduar se sulmet u shkaktuan dëme të mëdha anijeve, transmeton Anadolu.
Në një deklaratë, IRGC-ja tha se “sulmet u kryen në përgjigje të agresionit amerikan, përfshirë një sulm ndaj pesë cisternave iraniane të naftës në Gjirin Persik”. IRGC-ja nuk identifikoi anijet amerikane apo cisternat e naftës që tha se u shënjestruan dhe as nuk dha detaje se kur ndodhën sulmet.
Në deklaratë thuhej se forcat detare iraniane kishin shënjestruar 10 anije të tjera që “tentuan të hynin në një zonë të kufizuar dhe të pasigurt të Ngushticës së Hormuzit”, duke pretenduar se ato vepronin me “inkurajimin dhe mbështetjen e ushtrisë amerikane”.
IRGC-ja tha se forcat e saj detare vazhduan të ushtronin “kontroll të plotë” mbi Ngushticën e Hormuzit, një rrugë ujore me rëndësi strategjike, përmes së cilës kalon një pjesë e konsiderueshme e furnizimeve globale të naftës përmes detit. IRGC-ja rikonfirmoi se Ngushtica e Hormuzit mbetet nën mbikëqyrjen dhe menaxhimin e forcave të saj detare.
Më herët, agjencia iraniane e lajmeve Tasnim raportoi se një cisternë ishte goditur pranë zonës së ankorimit të ishullit iranian Kharg, pa viktima të raportuara dhe se ekuipazhi ishte evakuuar. Transmetuesi shtetëror IRIB raportoi veçmas se dy cisterna nafte u sulmuan pranë portit të Jaskut dhe se ekuipazhet e tyre u evakuuan në breg me varka shpëtimi.
Ndërkohë, Komanda Qendrore e SHBA-së (CENTCOM) tha se forcat amerikane shkatërruan pesë cisterna iraniane të naftës bruto pasi IRGC-ja shënjestroi dy herë me raketa balistike një anije luftarake të Marinës amerikane gjatë dy ditëve të fundit.
Zhvillimet ndodhën në mes të tensioneve të shtuara mes Iranit dhe SHBA-së lidhur me Ngushticën e Hormuzit, pavarësisht nënshkrimit të një memorandumi për rihapjen e rrugës ujore strategjike si paraprijëse e një marrëveshjeje më të gjerë paqeje.
