Gjermania thirrje Izraelit të ndalojë planet për mbi 1.000 njësi të paligjshme banimi në Bregun Perëndimor

Gjermania dënoi tenderin e Izraelit për mbi 1.000 njësi banimi në vendbanimet e paligjshme në Bregun Perëndimor dhe i bëri thirrje të heqë dorë nga plani, duke thënë se ai dëmton shpresat për një zgjidhje diplomatike, raporton Anadolu.

Zëvendëszëdhënësi i Ministrisë së Jashtme, Martin Giese, tha se zgjerimi i vendbanimeve kolone në territoret e pushtuara palestineze shkel të drejtën ndërkombëtare dhe rrezikon perspektivën e zgjidhjes me dy shtete.

“Dënojmë tenderin e publikuar dje për mbi 1.000 njësi banimi për projektin e vendbanimit kolon izraelit E1”, tha ai në një konferencë për shtyp në Berlin. “Kjo pengon rrugën – të kërkuar nga komuniteti ndërkombëtar dhe Gjykata Ndërkombëtare e Drejtësisë – drejt përfundimit të pushtimit izraelit të Bregut Perëndimor, duke rrezikuar kështu perspektivën e një zgjidhjeje të negociuar me dy shtete”, shtoi zyrtari gjerman.

Giese tha se zbatimi i projektit E1 do ta ndante efektivisht Bregun Perëndimor në dy pjesë dhe do ta shkëpuste atë nga Jerusalemi Lindor, duke e bërë të pazbatueshme zgjidhjen me dy shtete.

“Prandaj, i bëjmë edhe një herë thirrje qeverisë izraelite të ndalojë planet për vendbanimin E1 dhe të ndërpresë ndërtimin e vendbanimeve kolone në Bregun Perëndimor”, tha ai.

Gjermania, shtoi ai, nuk do të njohë asnjë ndryshim të kufijve të vitit 1967 që nuk është dakorduar nga palët në konflikt.

“Qeveria gjermane kundërshton qartë çdo plan të qeverisë izraelite për aneksim”, theksoi Giese.

“Qeveria gjermane do të vazhdojë të punojë me partnerët e saj evropianë dhe ndërkombëtarë për të krijuar kushtet e nevojshme për një paqe të qëndrueshme dhe një zgjidhje të negociuar me dy shtete”, deklaroi zëdhënësi.