Gjenden të vdekur 12 emigrantë ndërsa 105 të tjerë shpëtohen në ujërat pranë Kretës në Greqi

Të paktën 12 emigrantë janë gjetur të vdekur ndërsa rreth 105 të tjerë janë shpëtuar gjatë tri operacioneve të ndara në brigjet jugore të Kretës, njoftuan sot autoritetet greke, transmeton Anadolu.

Në incidentin më të rëndë, një anije mallrash me flamur maroken vërejti një varkë me emigrantë rreth 15 milje detare në juglindje të Kali Limenes, raportoi gazeta greke “Kathimerini”. Një anije e Rojës Bregdetare greke mbërriti në vendngjarje, duke shpëtuar 18 persona ndërsa nxorri trupat e 12 viktimave.

Në dy incidente të tjera, u zbuluan dy varka që transportonin përkatësisht 47 dhe 40 emigrantë, rreth 30 dhe 31 milje detare (56 dhe 57 kilometra) në jug të Kali Limenesit.

Mjetet ajrore të Agjencisë Evropiane të Rojës Kufitare dhe Bregdetare (Frontex), përfshirë avionë me pilot dhe pa pilot, ndihmuan në lokalizimin e varkave. Gjithsej 87 emigrantë u shpëtuan nga anijet e Frontex-it dhe pritej të transferoheshin në portin e Kali Limenesit.

Me këto tri operacione, numri i përgjithshëm i emigrantëve të shpëtuar arrin në rreth 105.