Forcat izraelite vr.asin katër palestinezë në Gaza, përfshirë një grua
Forcat izraelite vranë katër palestinezë, përfshirë një grua, në Rripin e Gazës përmes sulmeve ajrore dhe të shtënave me armë zjarri, sipas burimeve mjekësore dhe dëshmitarëve.
Tre palestinezë u vranë në një sulm ajror izraelit që kishte në shënjestër lagjen Al-Amal në qendër të Khan Younisit në jug të Gazës ndërsa trupat u dërguan në spitalin “Nasser”, thanë burimet mjekësore.
Dëshmitarët thanë se një dron izraelit lëshoi të paktën një raketë ndaj një grupi njerëzish në zonë, duke vrarë tre persona. Në një incident të veçantë, artileria izraelite goditi zonat lindore të Khan Younis, brenda zonave ku janë të vendosura forcat izraelite, pa raportime për viktima.
Në veri të Gazës, një grua 30-vjeçare u vra dhe të tjerë u plagosën pasi forcat detare izraelite hapën zjarr drejt tendave që strehojnë persona të zhvendosur në zonën Al-Salatin në perëndim të Beit Lahia, sipas burimeve mjekësore dhe dëshmitarëve.
Incidentet vijnë si një shkeljeve e vazhdueshme izraelite të armëpushimit në fuqi që nga 10 tetori 2025. Zyra e medias e qeverisë së Gazës tha të martën e kaluar se forcat izraelite kanë kryer rreth 2.400 shkelje që nga hyrja në fuqi e marrëveshjes, përfshirë vrasje, arrestime, bllokada dhe masa urie.
Sipas Ministrisë së Shëndetësisë në Gaza, këto shkelje kanë rezultuar në vdekjen e 777 palestinezëve dhe plagosjen e 2.193 të tjerëve deri të hënën.
Armëpushimi pasoi dy vjet luftë gjenocidale të Izraelit që filloi në tetor 2023, e cila ka vrarë më shumë se 72 mijë palestinezë dhe ka plagosur mbi 172 mijë të tjerë ndërsa ka shkatërruar rreth 90 për qind të infrastrukturës civile të Gazës, sipas shifrave zyrtare.
