DPHM paralajmëron mot të paqëndrueshëm, priten reshje intensive dhe erë e fuqishme
Drejtoria për Punë Hidrometeorologjike (DPHM) ka publikuar një njoftim të jashtëzakonshëm lidhur me gjendjen aktuale të motit në vend.
Edhe pse vala kryesore e frontit të fuqishëm të ftohtë ishte paralajmëruar për nesër, pamjet më të fundit nga radarët tregojnë se atmosfera tashmë është destabilizuar ndjeshëm në disa pjesë të Maqedonisë së Veriut.
“Sipas pamjes më të fundit radarike, në rajonet malore perëndimore dhe jugperëndimore aktualisht ka paraqitje të paqëndrueshmërisë të shoqëruar me reshje të rrëmbyeshme shiu dhe bubullima të fuqishme”, njoftojnë nga DPHM.
Sipas parashikimit aktual të motit, nesër do të vazhdojë të mbajë mot i ngrohtë. Gjatë orëve të pasdites, natës dhe paradites së së premtes priten reshje të herëpashershme shiu.
Lokalisht moti do të jetë i paqëndrueshëm, me reshje intensive, bubullima dhe erë të përforcuar. Në disa zona proceset do të jenë më intensive, me sasi më të mëdha reshjesh (mbi 15 litra për metër katror) dhe me kushte për stuhi të shoqëruara me breshër.
Të premten pritet të fryjë erë e përforcuar nga veriu, ndërsa përgjatë luginës së Vardarit herë pas here erërat mund të jenë të forta, me shpejtësi mbi 60 kilometra në orë. Temperaturat ditore do të ulen nga 5 deri në 7 gradë Celsius.
Gjatë fundjavës moti do të jetë stabil dhe më i freskët, ndërsa nga e hëna temperaturat do të fillojnë sërish të rriten.
