Çair, mbyllet një segment rrugor dhe ndërpritet uji për shkak të punimeve

Komuna e Çairit ka njoftuar qytetarët se sot, më 10 shtator 2026, duke filluar nga ora 08:00, do të mbyllet për qarkullim një segment rrugor për shkak të një intervenimi të nevojshëm në rrjetin e ujësjellësit.

Sipas njoftimit, përkohësisht do të mbyllet segmenti nga rruga “Cvetan Dimov” deri te rruga “5 Maj” (“Pançe Nedellkovski”).

Rruga do të qëndrojë e mbyllur deri në përfundimin e punimeve.

Gjatë realizimit të intervenimit do të ketë edhe ndërprerje të furnizimit me ujë në këtë zonë, e cila gjithashtu do të zgjasë deri në përfundimin e punimeve në rrjet.

Komuna e Çairit u ka bërë thirrje qytetarëve dhe pjesëmarrësve në komunikacion që të tregojnë mirëkuptim dhe, gjatë kësaj periudhe, të shfrytëzojnë rrugët alternative.

Punimet pritet të përfundojnë gjatë ditës, ndërsa qarkullimi dhe furnizimi me ujë do të normalizohen pas përfundimit të intervenimit.