Banka Popullore i caktoi administratorët, Ilija Andovski u bë “njeriu i parë” i Alta Bankës

Tre punonjës të Bankës Popullore – Ilija Andovski, Vesna Stojçevska dhe Marija Todorovska – janë emëruar administratorë në “Alta Banka” SHA Manastir, me çka praktikisht menaxhimi i bankës kalon në duart e bankës qendrore. Nga ata, Ilija Andovski është autorizuar posaçërisht të nënshkruajë vendimet që do të dalin nga administrimi i vendosur.
Kjo është precizuar në vendimin e Bordit Ekzekutiv të Bankës Popullore, të cilin e ka marrë “Faktor”, të botuar në “Gazetën Zyrtare”, me të cilin më 1 nëntor është vendosur administrimi në bankën e Bitolës për shkak të rrethanave që, siç thuhet, mund të kërcënojnë seriozisht solventësinë e saj.

Të tre administratorët kanë kompetenca të barabarta, por vendimi parashikon që Ilija Andovski të jetë personi që do të nënshkruajë vendimet e marra në kuadër të administrimit. Kjo e bën atë nënshkruesin kryesor të vendimeve gjatë periudhës së menaxhimit të përkohshëm. Ilija Andovski është kuadër i vjetër i Bankës Popullore dhe ekspert bankar. Sipas të dhënave për punonjësit e Bankës Popullore nga maji 2025, ai ka qenë drejtor i Drejtorisë për mbikëqyrje të jashtme dhe licencim.
Marrin kompetencat e Bordit Drejtues dhe të Bordit Mbikëqyrës

Me emërimin e administratorëve, organet e deritanishme të menaxhimit dhe mbikëqyrjes në bankë humbasin kompetencat e tyre në favor të personave të emëruar nga Banka Popullore. Administratorët marrin autorizimet e Bordit Drejtues, Bordit Mbikëqyrës, si dhe të Asamblesë së aksionarëve, me përjashtim të vendimmarrjes për rritjen e kapitalit të bankës.

Ata marrin akses në ambientet e biznesit, pasurinë, librat tregtare dhe të gjithë dokumentacionin e bankës. Anëtarët e organeve të deritanishme të menaxhimit dhe personat e tjerë me të drejta dhe përgjegjësi speciale janë të detyruar t’u dorëzojnë të gjitha informacionet, dokumentet dhe raportet shtesë të nevojshme për veprimtarinë.

Vendimi parashikon edhe mundësinë e përfshirjes së Ministrisë së Punëve të Brendshme, përkatësisht policisë, nëse administratorët pengohen të hyjnë në ambientet e biznesit ose nëse dikush pengon ushtrimin e kompetencave të tyre.

Afati 21-ditor për përcaktimin e gjendjes në bankë

Një nga detyrat e para të tre administratorëve do të jetë të përcaktojnë gjendjen e plotë në “Alta Banka”. Për këtë kanë afat 21 ditë nga dita e emërimit të tyre, pas së cilës duhet të dorëzojnë raport te Bordi Ekzekutiv i Bankës Popullore.

Administrimi është vendosur për një periudhë prej tre muajsh, duke filluar nga dita kur vendimi i dorëzohet bankës. Gjatë kësaj periudhe, administratorët do të duhet të punojnë sipas ligjeve dhe udhëzimeve e drejtimeve me shkrim të Bordit Ekzekutiv të Bankës Popullore.

Përveç marrjes së menaxhimit, ata do të kenë kontroll edhe mbi të gjitha pagesat për shpenzimet e përgjithshme dhe administrative të nevojshme për funksionimin e bankës. Të tilla pagesa do të mund të realizohen vetëm me miratimin e tyre dhe me urdhër të nënshkruar.

Me vendimin, Banka Popullore praktikisht vendos kontroll të drejtpërdrejtë mbi veprimtarinë e “Alta Bankës” Bitola, pasi “Alta Bankës” serbe të Beogradit iu hoq leja e punës, dhe më pas u tërhoq edhe pëlqimi për pjesëmarrjen e saj të kualifikuar në bankën maqedonase.

Guvernatori Trajko Slaveski dje në një emision televiziv tha se një ekip prej shtatë punonjësish është caktuar për veprimtarinë e Alta Bankës Bitola dhe se pronari nga Beogradi është njoftuar që të hedhë aksionet në shitje, ose në të kundërt banka qendrore do t’i ofrojë në ankand, duke vlerësuar se ka persona të interesuar për blerje.