Anija e mallrave me 24 persona në bord fundoset pranë brigjeve të Indisë, shpëtohen 2 persona
Një anije mallrash me flamur panamez është fundosur pranë brigjeve të Odishas në lindje të Indisë, ndërsa dy persona u shpëtuan dhe autoritetet nisën një operacion të gjerë kërkim-shpëtimi, transmeton Anadolu.
Roja Bregdetare Indiane në rrjetin social amerikan X njoftoi se anija MV Ocean Winner kishte në bord 24 anëtarë të ekuipazhit, përfshirë 20 shtetas kinezë, tre nga Mianmari dhe një nga Bangladeshi.
Zyrtarët thanë se Qendra e Koordinimit të Shpëtimit Detar në Sri Vijaya Puram, kryeqyteti i Ishujve Andaman dhe Nikobar, nisi të shtunën një operacion shpëtimi pasi mori një sinjal alarmi nga anija Ocean Winner dhe më pas humbi kontaktin me anijen.
Roja Bregdetare Indiane tha se gjatë operacionit dy të mbijetuar u shpëtuan nga mjetet e shpëtimit.
Ajo shtoi se janë angazhuar gjithashtu tre anije për të kryer kërkime në sipërfaqen e detit për anëtarët e mbetur të ekuipazhit.
