Kompania ajrore spanjolle mohon akuzat për antisemitizëm pasi largoi nga fluturimi një grup hebrenjsh francezë
Kompania ajrore spanjolle, Vueling “mohoi kategorikisht” akuzat për antisemitizëm, pasi largoi një grup studentësh francezë dhe një mësues nga një prej fluturimeve të saj, transmeton Anadolu.
Rreth 50 fëmijë hebrenj dhe drejtori i tyre 21-vjeçar i kampit veror u larguan nga një fluturim nga Valencia në Paris të mërkurën, raportuan mediat izraelite.
Në një deklaratë, Vueling tha se pasagjerët adoleshentë shfaqën “sjellje shumë shqetësuese, duke vënë në rrezik zhvillimin e sigurt të fluturimit”.
Kompania ajrore tha se grupi kishte manipuluar pajisjet e emergjencës dhe kishte ndërprerë demonstrimin e detyrueshëm të sigurisë, duke injoruar vazhdimisht udhëzimet e ekuipazhit të kabinës.
“Pavarësisht disa paralajmërimeve, sjellja e papërshtatshme vazhdoi, gjë që detyroi aktivizimin e menjëhershëm të protokolleve të përcaktuara të sigurisë”, tha kompania ajrore, duke shtuar se ekuipazhi, duke vepruar me “profesionalizëm të plotë dhe në përputhje me procedurat e Vueling”, kërkoi ndërhyrjen e policisë spanjolle.
Forcat e sigurisë më vonë e larguan grupin nga avioni “për të prioritizuar sigurinë e pasagjerëve të tjerë”.
Lajmet e mediave dhe postimet në rrjetet sociale pretenduan se grupi u largua pasi studentët hebrenj të moshës 10 deri në 15-vjeç u dëgjuan duke kënduar këngë në hebraisht në aeroplan.
Ministri i Çështjeve të Diasporës dhe Luftës kundër Antisemitizmit i Izraelit, Amichai Chikli, i përsëriti këto lajme, duke pretenduar se drejtori i kampit u arrestua në një incident “serioz” antisemit.
“Ekuipazhi i linjës ajrore Vueling tha se Izraeli është një shtet terrorist”, pretendoi ministri izraelit, duke thënë se incidenti u shkaktua nga “fushata e gënjeshtrave të Hamasit”.
“Ne mohojmë kategorikisht çdo pretendim që lidh vendimin e ekuipazhit me shprehjen fetare të pasagjerëve të përfshirë, të cilën e respektojmë plotësisht. Në Vueling, ne hedhim poshtë kategorikisht çdo formë diskriminimi pa përjashtim”, tha kompania ajrore.
