Politikanët e ekstremit të djathtë në Izrael ‘të entuziazmuar’ pasi Trump konkretizon ëndrrat e tyre
Ajo që Trump lexoi nga dokumentet e tij ishte e përshtatur për përfaqësuesit ekstremistë të djathtë në qeverinë izraelite, sipas Menachem Klein, profesor i shkencave politike në Universitetin Bar-Ilan në Izrael.
“Kjo nuk është e rastësishme; është dëshira dhe ëndrra e tyre, jo vetëm për të përfunduar regjimin e Hamasit në Gaza, por për të zbatuar një plan të spastrimit etnik dhe për të zgjeruar popullsinë e tyre,” tha ai për Al Jazeera nga Jerusalemi Perëndimor.
Deklarata e Trumpit se ai mund të mbështesë aneksimin e Bregut Perëndimor të pushtuar sepse territori izraelit është “shumë i vogël” sinjalizon gjithashtu axhendën e fraksioneve të djathta në Izrael, shtoi profesori.
“Pyetja kyçe është nëse Arabia Saudite do ta kushtëzojë marrëveshjen e saj me SHBA-në dhe normalizimin me Izraelin me braktisjen e këtij plani, dhe jo vetëm me një deklaratë mbështetëse për të drejtën e palestinezëve për vetëvendosje.”
Koalicioni i ekstremit të djathtë izraelit është “i entuziazmuar” dhe e sheh si një ndryshim dramatik në situatën e tij, veçanërisht duke pasur parasysh dështimin për të arritur objektivat e luftës – shkatërrimin e Hamasit dhe lirimin e të gjithë pengjeve nga Gaza, shtoi Klein.
“Qendra politike izraelite është e heshtur. Ata nuk po thonë se kjo është kundër ligjit humanitar, një krim apo diçka që e kundërshtojnë. Ata janë shumë të kujdesshëm. Diskursi publik izraelit më parë e normalizoi gjenocidin në Gaza dhe tani po normalizon spastrimin etnik. Nuk ka asnjë thirrje kundërshtuese nga e ashtuquajtura opozitë izraelite ndaj kësaj,” tha ai. /Al Jazeera/
