Kancelari gjerman i kërkon presidentit të shpërndajë parlamentin
Kancelari i Gjermanisë, Olaf Scholz, i ka propozuar presidentit Frank-Walter Steinmeier që të shpërndajë parlamentin gjerman, transmeton Anadolu.
Zëdhënësja e presidentit gjerman, Cerstin Gammelin, në rrjetin social X njoftoi se presidenti Steinmeier priti në takim kancelarin Scholz pasi Bundestagu votoi mosbesimin ndaj qeverisë së tij.
Gammelin tha se kancelari Scholz i propozoi presidentit Steinmeier që të shpërndajë parlamentin dhe të fillojë organizimin e zgjedhjeve të parakohshme.
Duke bërë të ditur se presidenti ka 12 ditë kohë për të marrë vendimin për shpërndarjen e parlamentit, Gammelin tha se presidenti para se ta marrë këtë vendi do të takohet me liderët e grupeve parlamentare të partive politike në Bundestag.
Sipas kushtetutës, kur presidenti shpërndan parlamentin, zgjedhjet e parakohshme duhet të mbahen brenda 60 ditëve.
Pas krizës politike dhe ndarjes së koalicionit trepalësh midis socildemokratëve (SPD), liberalëve (FDP) dhe të Gjelbërve, kancelari Scholz i kërkoi parlamentit një votëbesim me qëllim hapjen e rrugës për shpalljen e zgjedhjeve të parakohshme në Gjermani.
Vota e besimit ishte një lëvizje e llogaritur politike për t’i hapur rrugën zgjedhjeve të parakohshme në shkurt të vitit 2025.
Në një fjalim në parlament, Scholz mbrojti vendimin e tij për t’i dhënë fund koalicionit me partinë liberale FDP, duke theksuar se zgjedhjet e parakohshme do t’u lejojnë votuesve të përcaktojnë drejtimin e ardhshëm të vendit.
