Afrim Gashi: Republika e Turqisë është një mbështetëse e madhe e jona, një mik i madh

Republika e Turqisë është një mbështetëse e madhe e jona, një mik i madh me të cilën gjithmonë kemi pasur, dhe shpresoj ta kemi edhe në të ardhmen, një bashkëpunim të shkëlqyer, deklaroi kryetari i Kuvendit të RMV-së, Afrim Gashi i cili po qëndron për vizitë zyrtare në Turqi.

“Edhe pse nuk jemi fqinj drejtpërdrejt, në Maqedoninë e Veriut shpesh themi se Turqija është një ndër fqinjët tanë më të vlefshëm dhe më të mirë. Kam dëshirë që bashkëpunimin tonë ta rrisim në fusha të rëndësishme si ekonomia, kultura dhe arsimi, dhe të zgjerojmë bashkëpunimin në çdo fushë të mundshme. E vlerësoj shumë rëndësinë e vizitave dhe kam ftuar kryeparlamentarin turk z.Kurtulmush që të vizitojë Maqedoninë e Veriut. Pas konferencës së përbashkët për shtyp, së bashku me z.Kurtulmush, vendosëm lule në zonën e bombarduar gjatë tentativës për grusht shteti nga organizata terroriste FETO më 15 korrik 2016”, ka shkruar Gashi në Facebook.

Në kuadër të vizitës zyrtare në Turqi, kryeparlamentari Gashi ka zhvilluar takim edhe me presidentin e Turqisë, Recep Tayyip Erdogan dhe me ministrin e Jashtëm, Hakan Fidan.