Shporta minimale për muajin shtator arrin afro një mijë euro

Sipas llogaritjeve të Lidhjes së Sindikatave të Maqedonisë, shpenzimet minimale për një familje katër-anëtarëshe në shtator arrijnë në 61.306 denarë, një rritje prej 107 denarësh krahasuar me muajin gusht kur shpenzimet ishin 61.199 denarë.

Të dhënat shqetësuese vijnë nga shpenzimet për ushqim dhe pije për muajin shtator, të cilat arrijnë në 23.034 denarë krahasuar me 22.317 denarë në gusht, duke shënuar një rritje prej 717 denarësh. Kjo tregon se tregtarët kanë shfrytëzuar paralajmërimet për vendosjen e kufizimeve mbi marzhat ose çmimet për të rritur çmimet e produkteve bazë ushqimore para se vendimi i qeverisë të shpallej në Gazetën Zyrtare. Kjo ka ndikuar në përfitimet e tregtarëve dhe ka garantuar çmime të rritura për periudhën e ardhshme, në dëm të qytetarëve dhe punëtorëve të Maqedonisë.

Lidhja e Sindikatave të Maqedonisë shton se pjesa e shpenzimeve për ushqim dhe pije në shportën minimale sindikale është marrë nga lista e produkteve me marzha të kufizuara nga qeveria. Nëse kjo masë respektohet nga tregtarët, pritet që të kontribuojë në uljen e shpenzimeve për ushqim dhe pije për kategoritë më të prekura të qytetarëve dhe punëtorët me të ardhura më të ulëta.