Georgievski thumbon ZNAM-in: Mbrojnë maqedonishten në provim, por në Kumanovë nuk dëgjohet këngë maqedonase

Ish-kryeministri i Maqedonisë së Veriut, Ljupço Georgievski, ka kritikuar ashpër partinë ZNAM, duke e akuzuar për mungesë idesh politike dhe për shndërrimin e çështjes së gjuhës në provimin e jurisprudencës në problem ndëretnik.

Në një reagim të publikuar në Facebook, Georgievski thotë se ZNAM-i prej muajsh përsërit të njëjtën temë, duke këmbëngulur se do ta mbrojë deri në fund gjuhën maqedonase në provimin e jurisprudencës.

“Partia ZNAM, prej muajsh, si një pllakë gramafoni e prishur, përsërit vetëm një temë: Ata do ta mbrojnë deri në fund gjuhën maqedonase në provimin e jurisprudencës. Ndërkohë, në Kumanovë nuk ke asnjë mundësi të dëgjosh një këngë maqedonase!”, shkruan Georgievski.

Sipas tij, problemi qëndron në dy çështje thelbësore: mungesën e plotë të ideve politike dhe hapjen e qëllimshme të një çështjeje të vogël, duke e mbajtur atë gjallë si problem të madh në një shoqëri multietnike.

Deklarata e ish-kryeministrit vjen në kohën kur çështja e përdorimit të gjuhës shqipe në provimin e jurisprudencës ka nxitur debate politike në vend.