“Njerëzit po vdesin në mënyra të shumta”: Zjarri në një tendë u merr jetën dy foshnjave në Gaza

Habiba duhej të merrte të shtunën vaksinat e saj të moshës dymuajshe. Në vend të kësaj, familja e saj vajtoi vdekjen e saj dhe të shtatëmuajshes Aseel, pasi një zjarr përfshiu tendën ku të afërmit e tyre ishin mbledhur në jug të Rripit të Gazës.

Vizita e familjes në al-Mawasi, në perëndim të Khan Younisit, përfundoi në një përpjekje të dëshpëruar për të shpëtuar dy foshnjat, kur të premten pasdite shpërtheu zjarri.

Të dyja pësuan djegie të rënda dhe u shtruan në kujdesin intensiv. Ato ndërruan jetë të shtunën në mëngjes.

Kompleksi Mjekësor Nasser i identifikoi ato si Habiba Mohammed Zanoun, dymuajshe, dhe Aseel Abu Suhayban, shtatëmuajshe.

Burime thanë për Anadolu se zjarri nisi gjatë gatimit të ushqimit brenda tendës. Sipas tyre, mungesat e mëdha të gazit për gatim dhe të furnizimeve bazë, si pasojë e bllokadës izraelite, i kanë detyruar familjet e zhvendosura të përgatisin ushqimin mbi flakë të hapura.

– “Pse po na ndodh e gjithë kjo?”
Gjyshja e vajzave, e cila nuk pranoi të identifikohej, tha për Anadolu se vajza e saj kishte ardhur për të vizituar familjen në tendën e tyre kur papritur shpërtheu zjarri.

Habiba ishte vajza e saj, tha ajo. Foshnja ndërroi jetë pikërisht në ditën kur duhej të merrte vaksinat e moshës dymuajshe.

Nëna e Aseelit nxitoi për të shpëtuar të bijën, por pësoi djegie. Edhe ajo u dërgua në spital.

Gjyshja tha se asnjëra prej foshnjave nuk mundi t’u mbijetonte plagëve të rënda.

“Pse po na ndodh e gjithë kjo?”, pyeti ajo. “Çdo ditë ka aksidente, bombardime dhe zjarre, dhe njerëzit po vdesin në mënyra të shumta”, shtoi ajo.

“Prej tre vitesh po jetojmë kështu, mes zhvendosjes, ankthit dhe dhimbjes”, shpjegoi gjyshja.

– Gatimi pa alternativa të sigurta
Zjarri ishte njëri nga tri zjarret e raportuara të premten në tendat e familjeve të zhvendosura në Gazën qendrore dhe jugore, sipas burimeve.

Për shkak të mungesës së gazit për gatim, familjet janë detyruar të përdorin zjarre të improvizuara për të përgatitur ushqimin. Brenda strehimoreve të mbipopulluara, të ndërtuara me materiale të ndezshme, një nevojë e përditshme mund të rrezikojë jetën e njerëzve.

Zyra e OKB-së për Koordinimin e Çështjeve Humanitare (OCHA) paralajmëroi në qershor se gatimi brenda tendave të familjeve të zhvendosura ishte një nga shkaqet kryesore të zjarreve.

Batanijet, copat e vjetra të pëlhurave, kartoni dhe mbulesat plastike që përdoren për të përforcuar strehimoret bëjnë që flakët të përhapen me shpejtësi dhe e vështirësojnë shuarjen e zjarreve, thuhej në paralajmërim.

Zjarret janë një nga rreziqet e shumta me të cilat përballen familjet që jetojnë në tenda të amortizuara, të cilat ofrojnë pak mbrojtje nga kushtet atmosferike.

OCHA raportoi gjithashtu se autoritetet izraelite më 26 gusht dhe 2 shtator refuzuan hyrjen e një dërgese të miratuar më parë përmes korridorit egjiptian, e cila përmbante 36.960 copë lëndë drusore dhe 660 komplete emergjente për strehim.

Zyra Qeveritare e Medias në Gaza kishte raportuar më parë se më shumë se 800 mijë palestinezë të zhvendosur po jetonin në tenda të papërshtatshme për banim njerëzor. Sipas vlerësimit të saj, 162 mijë nga 270 mijë tendat në Gaza kishin nevojë për zëvendësim të menjëhershëm.

Gjyshja, e cila po vajton humbjen e dy mbesave, i bëri thirrje botës që t’u kushtojë vëmendje familjeve të zhvendosura në Gaza dhe të ndihmojë në përfundimin e vuajtjeve të tyre.