Policia Financiare ngre kallëzim, dyshime për falimentim të qëllimshëm për të shmangur borxhe prej miliona eurosh
Policia Financiare ka ngritur kallëzim penal kundër dy personave dhe dy kompanive, nën dyshimet për shkaktim të qëllimshëm të falimentimit, me qëllim shmangien e borxheve ndaj kreditorëve.
Sipas hetimit, pronari i një kompanie nga Vallandova dyshohet se gjatë periudhës 2020–2023 ka ndërmarrë veprime për ta paraqitur kompaninë si financiarisht të paaftë, për të shmangur pagesën e borxheve që arrijnë në mbi 290 milionë denarë, kryesisht ndaj një kompanie të huaj.
Sipas Policisë Financiare, pronari kishte lidhur një kontratë qiraje me një kompani tjetër që gjithashtu e drejtonte vetë. Edhe pse kontrata nuk ishte realizuar, pas ndërprerjes së saj ishin regjistruar penalitete prej 233.7 milionë denarësh dhe ishte vendosur barrë mbi pasurinë e kompanisë. Gjykata më pas kishte ndaluar ekzekutimin pas kundërshtimit të kreditorëve.
Pasi nuk kishte arritur ta tjetërsonte pasurinë, ai dyshohet se, me ndihmën e një personi tjetër, kishte transferuar 4 milionë denarë në emër të një huaje dhe më pas kishte kërkuar hapjen e procedurës së falimentimit.
Rasti i është dorëzuar Prokurorisë në Veles për procedim të mëtejshëm. Përgjegjësia penale e të kallëzuarve mbetet për t’u vërtetuar në procedurë gjyqësore.
