Harta e Netanyahut paraqet RSF-në si “miqësore” me Izraelin dhe Emiratet e Bashkuara Arabe, si dhe mbështetjen për lëvizjet separatiste
Harta, e cila mbante logon e Institutit Friedrich Ebert të Gjermanisë, nuk do t’i befasojë vëzhguesit e zhvillimeve rajonale, por mund të krijojë vështirësi për disa nga partnerët rajonalë të Izraelit dhe të forcojë dyshimet mes shteteve arabe.
Izraeli dhe Emiratet e Bashkuara Arabe paraqiteshin si pjesë e një “Aleance Gjashtëkëndore”. Në hartë, të rreshtuara me to shfaqeshin edhe Greqia, Etiopia dhe disa pjesë të Indisë. Por harta paraqiste gjithashtu një pjesë të gjerë të Sudanit jugperëndimor si zonë miqësore me Emiratet dhe Izraelin.
Forcat e Mbështetjes së Shpejtë (RSF) kontrollojnë Sudanin jugperëndimor. Ekspertë të Kombeve të Bashkuara dhe dhjetëra raportime mediatike, përfshirë ato të Middle East Eye, kanë zbuluar mbështetje të gjerë nga Emiratet për këtë grup paraushtarak sudanez, i cili udhëhiqet nga Mohamed Hamdan Dagalo, ish-udhëheqës i milicive Janjaweed, dhe është akuzuar gjerësisht për kryerjen e gjenocidit në Darfur. Emiratet e Bashkuara Arabe kanë mohuar zyrtarisht se e mbështesin RSF-në.
Harta ishte pjesë e prezantimit që Netanyahu bëri të dielën të një doktrine të re të sigurisë, e cila vë theksin te sulmet parandaluese dhe krijimi i “zonave tampon” përgjatë kufijve të Izraelit.
“Lufta e Shpëtimit e bëri të domosdoshëm përditësimin e parimeve themelore të doktrinës tradicionale të sigurisë kombëtare, ndër to: dhënien përparësi parandalimit dhe ofensivës ndaj frenimit dhe mbrojtjes, përfshirë ndërmarrjen e sulmeve parandaluese për të penguar kërcënimet në zhvillim; forcimin e mbrojtjes së frontit të brendshëm kundër kërcënimeve të reja; si dhe konsolidimin e statusit të Izraelit si fuqi rajonale”, thuhej në një deklaratë të zyrës së Netanyahut të dielën.
“Në rajonin tonë dhe përtej tij janë krijuar mundësi për ndërtimin e aleancave të reja”, shtohej në deklaratë.
“Aleanca Diamant e Shteteve Sunite”
Harta e publikuar nga Netanyahu e paraqet Izraelin të rreshtuar me grupet separatiste, ndërsa disa nga partnerët e tij më të vjetër arabë, me të cilët ka traktate, paraqiten si shtete që nuk konsiderohen miqësore me Izraelin. Egjipti dhe Jordania nuk paraqiten si vende të rreshtuara me Izraelin.
Përkundrazi, Egjipti shënohet si pjesë e një “Aleance Diamant të Shteteve Sunite”, së bashku me Pakistanin, Turqinë dhe Arabinë Saudite. Jordania, e cila ka një traktat paqeje me Izraelin që nga viti 1994, paraqitet si “miqësore” me këtë aleancë.
Prezantimi publik i Netanyahut ka gjasa të shtojë shqetësimet e kritikëve lidhur me mbështetjen e Izraelit për grupet separatiste dhe ndarjen e shteteve të brishta. Në hartë, një qeveri në Libinë lindore, e kontrolluar nga Khalifa Haftar, paraqitet si e rreshtuar me Izraelin.
Edhe Këshilli Tranzitor Jugor i Jemenit, një lëvizje separatiste e mbështetur nga Emiratet, e cila u shpërbë në janar të vitit 2026 dhe u rishfaq si Këshilli Tranzitor i Arabisë Jugore, paraqitet në hartë si miqësor me Izraelin dhe Emiratet e Bashkuara Arabe.
Izraeli u bë vendi i parë që e njohu Somalilandin në fillim të këtij viti. Somaliland është një republikë e shkëputur nga Somalia, ku Izraeli dhe Emiratet kanë zgjeruar praninë e tyre ushtarake, sipas raportimeve të shumta mediatike.
Harta e Netanyahut tregon se Izraeli e koncepton sigurinë e tij si pjesë të një rajoni më të gjerë, që shtrihet përtej botës arabe.
Netanyahu i paraqiti Greqinë dhe Etiopinë si shtete “miqësore”. Etiopia ndodhet në prag të një lufte në shkallë të gjerë me Eritrenë, ku Izraeli prej kohësh synon të sigurojë një bazë ushtarake në Detin e Kuq, ka raportuar Middle East Eye.
Harta e Netanyahut rikonfirmoi gjithashtu lidhjet e kahershme mes Hezbollahut, lëvizjes Huthi dhe Iranit, të paraqitura si pjesë e një “Boshti të Rezistencës”. /MEE/
