Organizatorët e protestës “Jo në emrin tim” kanë zhvilluar një aksion simbolik para Kuvendit të Kosovës. Ata kanë vendosur një baner me emrat e të gjithë deputetëve të Kuvendit, duke u bërë thirrje atyre që të votojnë ligjin për Ushtrinë Çlirimtare të Kosovës.
Sipas organizatorëve, ligji për UÇK-në duhet të jetë prioritet për Kuvendin e Kosovës, ndërsa deputetëve u bëhet thirrje të reflektojnë dhe të ndërmarrin hapa për votimin e tij.
Çlirim Haziri tha se deputetët shqiptarë kanë obligim ndaj UÇK-së dhe sakrificës së dëshmorëve, mbi të cilën, sipas tij, janë ndërtuar institucionet e Kosovës.
“UÇK-ja nuk është e partive politike, UÇK-ja është e popullit. Ju jeni deputetë të zgjedhur prej popullit dhe keni obligim moral, kombëtar dhe ligjor ndaj popullit të Kosovës të reflektoni për kërkesat e tyre. UÇK-ja nuk duhet të jetë një temë sekondare për Parlamentin e Kosovës, duhet të jetë në prioritetet e deputetëve tanë”, ka thënë Haziri.
Në banerin e vendosur para Kuvendit janë përfshirë të gjithë deputetët, ndërsa organizatorët kanë bërë dallimin mes deputetëve shqiptarë dhe atyre të komunitetit serb, nga të cilët thanw se nuk presin mbështetje për këtë nismë.
