Ushtria izraelite përgatitet për fazë të re të luftimeve në jug të Libanit
Ushtria izraelite po përgatitet të hyjë në një fazë të re të luftimeve në jug të Libanit në ditët në vijim, transmeton Anadolu.
Lajmi vjen ndërsa ushtria vazhdon sulmet në jug të Libanit, në shkelje të marrëveshjes kornizë të ndërmjetësuar nga SHBA-ja dhe të nënshkruar me Bejrutin në qershor. Ushtria do të riorganizojë forcat e saj në atë që e quan “zona e verdhë”, përfshirë zvogëlimin dhe ripozicionimin e trupave të dislokuara përgjatë vijës, raportoi televizioni izraelit “Channel 12”.
Në prill, Tel Avivi njoftoi se kishte krijuar atë që e quan “vija e verdhë” në jug të Libanit. Ajo është një vijë imagjinare që ndan një “zonë tampon” të pushtuar nga Izraeli nga pjesa tjetër e territorit libanez, duke u shtrirë deri në 10 kilometra brenda Libanit në disa zona.
Izraeli e konsideron hapësirën mes “vijës së verdhë” dhe kufirit si “zonë tampon sigurie” ndërsa Libani kundërshton praninë e vazhdueshme të forcave izraelite në territorin e tij dhe kërkon tërheqjen e tyre. Sipas medias, ushtria po përgatitet të qëndrojë në këtë zonë për një periudhë të gjatë, duke ngritur dhe përfunduar një vijë të re pozicionesh të avancuara.
Përgatitjet përfshijnë gjithashtu vazhdimin e operacioneve kundër personave që zyrtarët izraelitë pretendojnë se janë pjesëtarë të Hezbollahut, thuhet në raport. Ofensiva izraelite në Liban ka vrarë të paktën 4.386 persona, ka plagosur 12.407 dhe ka zhvendosur më shumë se 1 milion të tjerë që nga 2 marsi, sipas autoriteteve libaneze.
Sulmet vazhdojnë pavarësisht marrëveshjes kornizë të qershorit, e cila parashikon tërheqjen graduale të Izraelit nga territori i pushtuar libanez, në këmbim të dislokimit të ushtrisë libaneze atje dhe çarmatimit të Hezbollahut.
