Abdixhiku akuzon Baton Haxhiun dhe Berat Buzhalën: Po shtyjnë një agjendë kundër LDK-së
Kryetari i Lidhjes Demokratike të Kosovës, Lumir Abdixhiku, ka drejtuar akuza të forta ndaj Baton Haxhiut dhe Berat Buzhalës, duke pretenduar se kërkesa për zgjedhje të jashtëzakonshme nuk përfaqëson vullnetin e shumicës së anëtarësisë së LDK-së.
Në një intervistë në emisionin “Adresa” në Kanal 10, Abdixhiku deklaroi se shumica dërrmuese e anëtarëve të partisë së tij nuk dëshirojnë zgjedhje të reja.
Sipas tij, ideja për ta çuar vendin sërish në zgjedhje po promovohet prej javësh nga Haxhiu dhe Buzhala, së bashku me qarqe që ai i përshkroi si radikale brenda PDK-së.
Abdixhiku pretendoi gjithashtu se kjo agjendë synon krijimin e një blloku të madh opozitar, në të cilin LDK-ja do të vendosej në pozitë të nënshtruar.
Kreu i LDK-së kundërshtoi mundësinë e një bashkimi të tillë, duke argumentuar se elektorati i partisë së tij dallon nga ai i PDK-së. Sipas tij, një afrim i tillë nuk do t’i transferonte votat e LDK-së te partitë e tjera opozitare, por do t’i shtynte ato drejt Vetëvendosjes.
Deklaratat e Abdixhikut vijnë në një periudhë përplasjesh të forta brenda LDK-së për mënyrën e veprimit rreth zgjedhjes së presidentit dhe mundësisë që Kosova të shkojë përsëri në zgjedhje.
