Presidenti i Koresë së Jugut kërkon pavarësi ushtarake nga SHBA-ja
Presidenti i Koresë së Jugut, Lee Jae Myung, ka rikthyer kërkesën që ushtria e vendit të marrë kontrollin e pavarur operacional në rast lufte, duke bërë thirrje gjithashtu për përshpejtimin e procesit për blerjen e nëndetëseve me energji bërthamore.
Deklarata e tij vjen një ditë pasi presidenti amerikan, Donald Trump, urdhëroi Pentagonin të reduktojë ndjeshëm stërvitjet e përbashkëta ushtarake SHBA–Kore e Jugut.
Trump tha të dielën në mbrëmje se kishte udhëzuar Pentagonin të “zvogëlojë ndjeshëm” stërvitjet e përbashkëta, duke argumentuar se Koreja e Veriut, e cila posedon armë bërthamore, “nuk ka qenë kërcënuese dhe ka treguar respekt”. Ai shtoi se ka një “marrëdhënie shumë të mirë me Kim Jong-un”.
Ndërkohë, presidenti Lee Jae Myung tha të martën se Seuli duhet të vazhdojë pa pengesa procesin e transferimit të kontrollit operacional në kohë lufte mbi forcat e Koresë së Jugut nga SHBA-ja. Ky ka qenë prej kohësh një nga objektivat kryesorë të administratës së tij.
Aleanca mes Koresë së Jugut dhe SHBA-së daton që nga Lufta e Koresë, e cila përfundoi në vitin 1953 me një armëpushim, por jo me një traktat zyrtar paqeje. Për këtë arsye, dy Koretë teknikisht mbeten ende në gjendje lufte.
Që prej asaj kohe, trupat amerikane janë të dislokuara në Korenë e Jugut, duke krijuar një nga pranitë më të mëdha ushtarake amerikane jashtë territorit të SHBA-së.
