Kriza në Ceuta, inteligjenca spanjolle kishte paralajmëruar qeverinë!
Detaje të reja tronditëse kanë dalë në dritë nga informacionet e inteligjencës ushtarake dhe civile, të cilat sugjerojnë se qeveria spanjolle ka qenë në dijeni dhe kishte marrë paralajmërime paraprake lidhur me rrezikun e një dyndjeje masive të emigrantëve në enklavën spanjolle në Afrikën e Veriut, Ceuta.
Sipas të dhënave, alarmet nga strukturat e inteligjencës u lëshuan përgjatë disa ditëve, duke kulmuar në orët e para përpara se dhjetëra mijëra persona të kalonin kufirin nga Maroku. Shërbimet sekrete kishin raportuar se Mbreti Mohammed VI mund të ndërmerrte një “gjest madhështie” në kufi, në kuadër të festimeve të Ditës së Fronit në Marok.
Këto alarme u shoqëruan me raporte të drejtpërdrejta për migrantë që niseshin duke notuar nga Fnideq (Castillejos) dhe autobusë të mbushur me njerëz që silleshin nga rajone të ndryshme marokene drejt zonës kufitare.
Gjatë një periudhe prej rreth dhjetë ditësh, afro 1,000 persona arritën të kalonin duke notuar drejt Ceutës. Zyrtarët e inteligjencës e interpretuan këtë lëvizje si një “provë gjenerale” të autoriteteve marokene, duke ia përcjellë menjëherë vlerësimin ekzekutivit spanjoll.
Në pikën kulmore të krizës, shifrat rezultuan dramatike, ku mes 60,000 dhe 75,000 emigrantë kaluan në territorin e Ceutës, duke shënuar krizën më të rëndë të migracionit në historinë e këtij qyteti autonom. Ndërkohë, sipas të dhënave nga Ministria e Brendshme e Spanjës, rreth 53,000 prej tyre u kthyen mbrapsht në Marok gjatë ditëve në vijim.
Përballë këtij fluksi të paprecedentë, efektivat e Gardës Civile dhe Policisë Kombëtare, të stacionuar në pikën kufitare të Tarajalit, ishin totalisht të pafuqishëm për të ndalur valën masive të njerëzve, duke u detyruar të përqendronin të gjitha forcat tek dhënia e ndihmës për të lënduarit.
