“Pse të ndalohet Rusia, por jo Izraeli?” – rritet zemërimi në protestat ndaj Eurovisionit

Qindra protestues kanë marshuar drejt arenës ku do të zhvillohet finalja e Eurovisionit në Vjenë, duke mbajtur flamuj palestinezë dhe një çarçaf të madh me mijëra emra të të vrarëve në Gaza.

Ajo për të cilën ata e akuzojnë Eurovisionin është normalizimi i krimeve të luftës duke lejuar Izraelin të ngjitet në skenë sonte. Kjo është protesta e tretë që po shohim në qytet lidhur me vendimin e Eurovisionit për të lejuar pjesëmarrjen e Izraelit, dhe kjo vërtet nxjerr në pah krizën me të cilën po përballet festivali.

Konkursi organizohet nga European Broadcasting Union, i cili këmbëngul se është jo-politik, por pesë transmetues të mëdhenj e kanë bojkotuar këtë vit. Ata nuk kanë dërguar përfaqësues, dhe si nga ata ashtu edhe nga protestuesit këtu dëgjohet zemërimi se Eurovisioni nuk po i zbaton rregullat në mënyrë të barabartë.

Pas ndalimit të Rusisë në vitin 2022, ata nuk e kuptojnë pse e njëjta gjë nuk po bëhet edhe ndaj Izraelit. Ndërkohë, finalja pritet të nisë së shpejti. Dhe nuk do të jetë vetëm çështje se kush fiton, por edhe e votës së publikut.

Aktualisht, Finlanda kryeson sondazhet, por këngëtarja izraelite Noah Betan ndodhet në pesëshen e parë. Vitin e kaluar, Izraeli fitoi bindshëm votën e publikut, gjë që befasoi shumë njerëz. Më vonë doli se qeveria izraelite kishte mbështetur financiarisht një fushatë online që inkurajonte votuesit në të gjithë Evropën të votonin për përfaqësuesin e tyre, gjë që teknikisht bie ndesh me frymën e konkursit. /Al Jazeera/