Inteligjenca ukrainase: Rusia po e ndihmon Iranin me imazhe satelitore
Inteligjenca ukrainase ka deklaruar se Rusia po e furnizon Iranin me mbështetje kibernetike dhe imazhe satelitore spiunazhi, me qëllim të përmirësimit të sulmeve iraniane me raketa dhe dronë në konfliktin e vazhdueshëm në Lindjen e Mesme.
Sipas një vlerësimi të inteligjencës ukrainase, të shqyrtuar nga agjencia e lajmeve Reuters, satelitët rusë kanë kryer dhjetëra studime të detajuara të objekteve ushtarake dhe vendeve strategjike në rajon, për të ndihmuar Iranin në shënjestrimin e forcave amerikane dhe objektivave të tjera.
Raporti thekson se satelitët rusë kanë realizuar të paktën 24 studime në 11 vende të Lindjes së Mesme, gjatë periudhës 21-31 mars, duke mbuluar gjithsej 46 objekte, përfshirë baza ushtarake, aeroporte dhe fusha nafte.
Në vlerësim thuhet se brenda disa ditësh pas këtyre studimeve, disa baza dhe seli ushtarake janë sulmuar nga raketa balistike dhe dronë iranianë, duke sugjeruar një “model të qartë” të koordinimit.
Reuters citon gjithashtu burime perëndimore dhe rajonale të sigurisë të cilat kanë konfirmuar se inteligjenca e tyre ka vërejtur aktivitet intensiv satelitor rus në rajon dhe ndarje të imazheve me Iranin.
Sipas raportit, nëntë studime janë kryer mbi pjesë të Arabisë Saudite, përfshirë edhe zonën e Qytetit Ushtarak të Mbretit Khalid, pranë Hafar Al-Batin, ku dyshohet se Rusia po ndihmonte Iranin të identifikojë elementë të sistemit amerikan të mbrojtjes ajrore THAAD.
Zona të Turqisë, Jordanisë, Kuvajtit dhe Emirateve të Bashkuara Arabe janë vëzhguar dy herë, ndërsa lokacione në Izrael, Katar, Irak, Bahrein dhe baza detare amerikane në Diego Garcia janë monitoruar një herë.
Raporti shton se satelitët rusë po monitorojnë edhe Ngushticën e Hormuzit, një rrugë ujore strategjike për tregtinë globale të naftës dhe gazit natyror të lëngshëm, ku Irani thuhet se ka vendosur një bllokadë de facto për shumicën e anijeve.
Sipas inteligjencës ukrainase, përveç imazheve satelitore, Rusia dhe Irani po bashkëpunojnë edhe në fushën kibernetike, përmes koordinimit mes hakerëve të të dyja vendeve.
