Liderja e së djathtës ekstreme franceze: SHBA-ja bëri gabim duke sulmuar Iranin
Liderja e së djathtës ekstreme franceze, Marine Le Pen ka deklaruar se SHBA-ja ka bërë qartazi gabim duke sulmuar Iranin, transmeton Anadolu.
“Ajo që shoh është se SHBA-ja ka bërë qartazi gabim, duke menduar se regjimi iranian do të rrëzohej brenda pak ditësh. Nuk ka rënë. Regjimi iranian është jashtëzakonisht i fortë”, tha Le Pen, kryetare e Tubimit Kombëtar (RN).
Për radion “France Inter”, Le Pen tha se qëllimet e luftës së Trumpit janë të paqarta dhe vuri në pikëpyetje objektivin përfundimtar të konfliktit, duke shtuar se askush nuk e di çfarë synohet të arrihet.
Le Pen theksoi se lufta ka ndikuar në disa vende të Gjirit dhe ka shkaktuar çekuilibër të madh në furnizimet me energji. “Rusia është furnizuesi i energjisë për Hungarinë. Ukraina pengon furnizimin me naftë të Rusisë drejt Hungarisë”, shtoi ajo.
Liderja e RN-së e përshkroi kryeministrin hungarez, Viktor Orban si një simbol rezistence ndaj Komisionit Evropian. “Është krejtësisht e natyrshme që të vij për të mbështetur aleatët tanë gjatë proceseve zgjedhore”, tha ajo duke theksuar se nuk ndërhyn në punët e brendshme të Hungarisë.
Përshkallëzimi rajonal ka vazhduar që nga 28 shkurti, kur SHBA-ja dhe Izraeli nisën ofensivë të përbashkët kundër Iranit, duke vrarë deri më tani mbi 1.300 persona, përfshirë edhe liderin e atëhershëm suprem, Ali Khamenei.
Irani është kundërpërgjigjur me sulme me dronë dhe raketa ndaj Izraelit, si dhe Jordanisë, Irakut dhe vendeve të Gjirit që strehojnë kapacitete ushtarake amerikane, duke shkaktuar viktima dhe dëme në infrastrukturë si dhe duke ndikuar në tregjet globale dhe në aviacion.
