Forcat izraelite vrasin 12 palestinezë në gjithë Gazën, raportohen sulme në Rafah
Të paktën 12 palestinezë, gjysma e tyre fëmijë, janë vrarë në Rripin e Gazës që nga agimi, një ditë para se pika kufitare e Rafahut të pritet të rihapet.
Një sulm ajror izraelit të shtunën mbi një tendë që strehonte persona të zhvendosur në zonën al-Mawasi, në veriperëndim të qytetit Khan Younis, vrau të paktën shtatë palestinezë, përfshirë tre fëmijë, kanë bërë të ditur burime mjekësore për Al Jazeera.
Trupat e tyre u dërguan në Kompleksin Mjekësor Nasser në Khan Younis.
Në qytetin e Gazës, shërbimet emergjente raportuan se të paktën pesë palestinezë, përfshirë tre fëmijë, u vranë në një sulm ajror izraelit mbi një ndërtesë banimi në lagjen Remal, në perëndim të qytetit.
Tetë palestinezë të tjerë u plagosën gjithashtu nga një bombardim izraelit mbi një ndërtesë banimi në lagjen Daraj të qytetit të Gazës.
Zyra Mediatike Qeveritare e Gazës thotë se të paktën 524 palestinezë janë vrarë nga forcat izraelite që kur një armëpushim i ndërmjetësuar nga Shtetet e Bashkuara në Gaza hyri në fuqi më 10 tetor.
Rihapja e Rafahut
Banorët e qytetit kufitar Rafah raportuan gjithashtu disa sulme ajrore në zona nën kontrollin izraelit. Izraeli pritet ta rihapë pikën kufitare të Rafahut, e cila lidh Gazën me Egjiptin, të dielën, për herë të parë që nga maji i vitit 2024.
Hapja e kësaj pike kyçe hyrëse është pjesë e marrëveshjes së armëpushimit me Hamasin. Ajo ishte paraparë të hapej gjatë fazës së parë të armëpushimit, por Izraeli refuzoi ta bënte këtë derisa të gjendej trupi i pengut të fundit të mbetur izraelit.
Izraeli tha të shtunën se do të lejojë vetëm një “lëvizje të kufizuar të njerëzve” që kanë marrë miratim sigurie nga Izraeli për të hyrë dhe dalë. Nuk do të lejohet hyrja e asnjë ndihme apo furnizimi humanitar.
“Vetëm ata që janë larguar gjatë dy viteve të fundit lejohen të kthehen,” shpjegoi për Al Jazeera Hani Mahmoud. “Ata që kanë lindur jashtë Rripit të Gazës nuk do të lejohen të kthehen.”
Hamasi reagoi ndaj njoftimit për Rafahun duke kërkuar nga Izraeli të lejojë lëvizjen brenda dhe jashtë Gazës “pa kufizime” dhe e nxiti atë t’i përmbahet të gjitha aspekteve të marrëveshjes së armëpushimit.
Lufta gjenocidale e Izraelit në Gaza ka vrarë më shumë se 71.600 palestinezë që nga 7 tetori 2023. /Al Jazeera/
