“Kokteje pesticidesh” përbëjnë mollët në të gjithë Evropën, zbulon studimi

Gupet mjedisore kanë ngritur alarmin pasi kanë gjetur “kokteje pesticidesh” toksike në mollët që shiten në të gjithë Evropën.

“Pan Europe”, një koalicion OJQ-sh që bën fushatë kundër përdorimit të pesticideve, ka analizuar rreth 60 lloje mollash të blera në 13 vende europiane, përfshirë Francën, Spanjën, Italinë dhe Poloninë, për mbetje kimike.

Sipas organizatave, 85% e mostrave përmbanin disa mbetje pesticidesh, ndërsa në disa mollë u gjetën gjurmë të deri shtatë kimikateve të ndryshme.

“Pan Europe” ka këshilluar konsumatorët të blejnë mollë organike ose t’i qërojnë mollët e kultivuara në mënyrë konvencionale, para se t’i konsumojnë.

Në 71% të rasteve, “Pan Europe” ka zbuluar pesticide të klasifikuara ndër më të rrezikshmet në BE, të cilat blloku synon t’i heqë gradualisht sa më shpejt të jetë e mundur.

Analiza ka treguar gjithashtu se 64% e mostrave përmbanin edhe kemikate polifluoroalkilike, të njohura si PFAS ose “kimikate të përhershme”, të cilat gjenden gjerësisht në mjedis dhe në produktet e përditshme.

Mbetjet e pesticideve lejohen në BE nën disa nivele maksimale të caktuara. Megjithatë, “Pan Europe” ka paralajmëruar për “efektin e koktejit”, kur konsumatorët ekspozohen njëkohësisht ndaj disa pesticideve në një produkt të vetëm.

Martin Dermine, një zyrtar i lartë i koalicionit, ka kritikuar Autoritetin Europian për Sigurinë Ushqimore për vlerësimin e pesticideve një e nga një, dhe jo të rrezikut nga “ekspozimi i shumëfishtë” ndaj disa substancave.

“Në këtë raport tregojmë se 85% e mollëve kanë mbetje të shumta dhe nuk e dimë nëse janë të sigurta për konsum apo jo”, ka thënë ai, duke përmendur lidhje të mundshme me kancerin dhe infertilitetin.

Nëse të njëjtat mollë do të shiteshin si ushqim i përpunuar për foshnje, 93% e mostrave do të ndaloheshin, sipas “Pan Europe”, pasi mbetjet e pesticideve tejkalojnë kufijtë më të rreptë të vendosur për fëmijët nën tre vjeç.

Rregullat e BE-së janë më të ashpra për ushqimet për foshnje për të mbrojtur zhvillimin e hershëm.

Mollët renditen ndër frutat më të preferuara të evropianëve dhe janë fruti më i kultivuar në BE, veçanërisht në Poloni, Itali dhe Francë.

Ato janë gjithashtu ndër frutat që trajtohen më shumë me pesticide, të përdorura kryesisht për të luftuar sëmundjen e zgjebes së mollës, kërcënimi kryesor kërpudhor për to.

Më shumë se gjysma e trajtimeve të shumta vjetore që i bëhen frutit, mesatarisht rreth 35, synojnë këtë sëmundje.